استانادا قازاقستانداعى العاشقى وتاندىق تاۋارلار عانا ساتىلاتىن ساۋدا ورتالىعى اشىلادى - فوتو
ساۋدا ورتالىعىندا وڭىرلەردەن اكەلىنگەن قازاقستاندىق تاۋارلار عانا ساتىلماق. جوبانىڭ ماقساتى - وتاندىق تاۋار وندىرۋشىلەردى قولداپ قانا قويماي، شەتەلدىك تۋريستەردىڭ قىزىعۋشىلىعىن تۋدىراتىن ساۋدا ورنىن اشۋ.
ق ر ۇلتتىق كاسىپكەرلىك پالاتاسىنىڭ قولداۋىمەن استانالىق ىسكەر ايەل قازاقستاندىق برەند دەپ اتاۋعا لايىق تاۋارلاردى ىزدەۋگە شىقتى.
جامبىل وبلىسىندا ا. نۇرلانوۆا تاۋار وندىرۋشىلەرمەن كەزدەسىپ، ونىمدەردى جەتكىزۋ بويىنشا كەلىسسوزدەر جۇرگىزدى. مۇندا كاسىپكەردى شۇجىق جانە ماكارون ونىمدەرى، جايما، «شيرين كومشارگ» ج ش س ءتاتتى ونىمدەرى قىزىقتىردى. كەي جامبىلدىق تاۋار وندىرۋشىلەرگە تاۋاردى بەزەندىرۋدە وزگەرىستەر ەنگىزۋ ۇسىنىلدى.
«اتامەكەن» ساۋدا ورتالىعى تۋرالى ايجان نۇرلانوۆا تولىق بايانداپ بەردى:
«استانادا سول جاعالاۋداعى ەليتالىق اۋداندا عيمارات دايىن. كەيىن وڭ جاعالاۋدا دا اشاتىن شىعارمىز. سۋپەرماركەت قازاق ۇلتتىق ستيلىندە بولادى، ديزاينەرلىك جۇمىسى، سورەلەرى ەرەكشە بولماق. سۋپەرماركەتتىڭ ءبىر بولىمىنە سەرتيفيكاتى بار، ەكولوگيالىق قاۋىپسىز جانە ءدامدى وتاندىق ازىق- تۇلىك ونىمدەرىن قويامىز.
بالالار تاعامىنا قويىلاتىن باستى تالاپ: بارلىعى تابيعي بولۋى ءتيىس. ءبىزدىڭ تاۋارلاردىڭ يمپورتتىق تاۋاردان ارتىقشىلىعىن كەم دەگەندە ءۇش تىلدە ايتاتىن قىزمەتكەرلەر بولادى. سۋپەرماركەتتىڭ ەكىنشى بولىمىندە كيىم، توسەك- ورىن زاتتارى، ۇلتتىق سۋۆەنيرلەر قويىلعان بۋتيكتەر بولادى.
ءۇشىنشى بولىمىندە «ءۇشقوڭىر» مەيرامحانا- گالەرەياسى ورنالاسپاق. ول كيىز ءۇي تۇرىندە بولادى. قازاقستاندا العاش رەت مەيرامحانادا وتاندىق ءونىم قويىلادى. بۇل ۇلتتىق ستيلدەگى كىلەمدەر، كارتينالار، قولونەر شىعارماشىلىعىنىڭ بۇيىمدارى، زەرگەرلىك بۇيىمدار. قوناقتارعا ءبىزدىڭ ۇلتتىق تاعامدارىمىز عانا ۇسىنىلادى. ءبىز ۇلتتىق ستيلدە ءۇي سالىپ، بەزەندىرىپ، كەلگەندەردى تاماقتاندىرۋعا بولاتىنىن دالەلدەمەكپىز»، - دەدى كاسىپكەر.
ەلدىڭ بارلىق ايماعىندا «اتامەكەن» ساۋدا ورتالىعىنىڭ فيليالدارىن اشۋ جوسپاردا بار.
