ەۋروپا ەلدەرى امەريكالىق اسكەري تەحنيكادان باس تارتپاق
اتالعان جوبا العاش رەت 2013 - جىلى قاراستىرىلعان بولاتىن. جوبا ماقۇلدانسا، امەريكالىق جانە يزرايلدىك تەحنولوگيالاردى ىعىستىرىپ شىعاراتىن ءتۇرى بار. تەحنيكا اسكەري بارلاۋ قاجەتتىلىگىنە ارنالعان.
جان- يۆ لە دريان، فرانسيانىڭ قورعانىس ءمينيسترى:
- Eurodrone جوباسىن ىسكە اسىرۋ جونىندەگى كەلىسىمشارت - ەۋروپالىق ىنتىماقتاستىق ءۇشىن اسا ماڭىزدى قادامداردىڭ ءبىرى. اسكەري ارەكەتتەر ءۇشىن قولدانامىز. سوندىقتان ءبىز جوبانى قولدايمىز.
ەۋرووداق مەملەكەتتەرىنىڭ عىلىمي- تەحنيكالىق قاۋىمداستىعىنىڭ ماقساتى دا وسى. 10 جىلدان كەيىن، ياعني 2025 - جىلدان باستاپ ۇشقىشسىز باسقارىلاتىن ۇشۋ اپپاراتتارىنىڭ ءوندىرىسىن باستاۋ. ولار شاعىن بولعانىمەن، الىس قاشىقتىقتا ۇشا الادى. اۋەدەن بارلاۋ ءۇشىن قولدانىلادى. ءتىپتى دروننىڭ كومەگىمەن جەرورتا تەڭىزى ارقىلى ەۋروپاعا وتەتىن زاڭسىز ميگراتسيانىڭ جولىن كەسۋگە مۇمكىندىك تە اشىلماق. سونىمەن قاتار ۇشۋ اپپاراتتارىن شەكارالىق باقىلاۋ، ءورت ءسوندىرۋ مەن تابيعي اپاتتاردىڭ الدىن الۋ ءۇشىن دە كادەگە جاراتپاق.
ۋرسۋلا فون دەر ليايەن، گەرمانيانىڭ قورعانىس ءمينيسترى:
- ەۋروپادا ءوزىنىڭ جەكە دروندارىن جاساۋعا قاجەتتى تەحنولوگيا دا، مۇمكىندىك تە بار. سوندىقتان ءبىز ەشكىمگە مۇقتاج ەمەسپىز. ۇشۋ اپپاراتتارىن وزگە دە سالادا قولدانۋدىڭ مۇمكىندىكتەرىن قاراستىراتىن بولامىز.
ۇشقىشسىز باسقارىلاتىن اپپاراتتى قۇراستىرۋمەن «ەيرباس»، «داسيۋ اۆياسون» مەن «اليەنيا اەرماكي» سەكىلدى الپاۋىت كومپانيا اينالىسپاق. سونىمەن قوسا يسپانيا مەن پولشا دا Eurodrone جوباسىنا قوسىلۋعا نيەتتى.
www.24.kz
