شەكاراعا جاقىن كەدەندىك بەكەتتەردەگى سىبايلاس جەمقورلىق جۇيەلى سيپاتقا يە بولۋدا - قايرات قوجامجاروۆ
«ەلىمىزدىڭ شەكاراسى پەريمەترى بويىنشا سىبايلاس جەمقورلىقتىڭ جۇيەلى كورىنىسىن ەڭسەرە الماي كەلەمىز. سوڭعى ايلاردا ءبىرقاتار قىلمىستىڭ بەتى اشىلدى. قازىرگى كەزدە تەرگەۋ امالدارى ءجۇرىپ جاتىر. اتاپ ايتقاندا، پارا كولەمى قوماقتى بولماسا دا، ول بۇگىندە جۇيەلى سيپاتقا يە بولىپ وتىر. ءبىزدىڭ ساراپشىلاردىڭ مالىمەتىنشە، بۇل تۇرعىدا جەكە ادامنان پارا 5 مىڭ تەڭگە بولعان جاعدايدا، كەدەننىڭ قاراپايىم بەكەتتەرىندە ولاردىڭ قىلمىستىق تابىستارى ايىنا 2-3 ميلليون دوللارعا جەتەدى»، - دەدى ق. قوجامجاروۆ «نۇر وتان» پارتياسى جانىنداعى جەمقورلىققا قارسى ءىس- قيمىل رەسپۋبليكالىق قوعامدىق كەڭەسىنىڭ وتىرىسىندا.
ونىڭ سوزىنە قاراعاندا، پاراقورلىقتىڭ وسىنداي سوراقى فاكتىلەرى ءبىرىنشى كەزەكتە مەملەكەتتىڭ يميدجىنە نۇقسان كەلتىرەدى. سوندىقتان دا بۇگىندە سىبايلاس جەمقورلىققا قارسى ماسەلەلەر باستى نازارعا الىنىپ وتىر.
اۆتور: رۋسلان عابباسوۆ
