قاراعاندىلىق دارىگەرلەر قاتەرلى ىسىكتى ەمدەۋدىڭ جاڭا تەحنولوگياسىن ۇسىندى
ءبىزدىڭ ماماندار ونىمەن جۇمىس ىستەۋدىڭ قىر- سىرىن قىتايدان ۇيرەنىپ قايتقان. ەندى اسپان استى ەلىنىڭ ونكولوگ- دارىگەرلەرى كەنشىلەر شاھارىنا كەلىپ، شەبەرلىك ساباعىن وتكىزىپ جاتىر.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، جىل سايىن جەر شارىندا 10 ميلليوننان استام ادام قاتەرلى ىسىك اۋرۋىنا شالدىعىپ، سونىڭ 6 ميلليوننان استامى كوز جۇمادى ەكەن. وكىنىشكە وراي، بۇل ىندەت سوڭعى جىلدارى ەلىمىزدە دە بەلەڭ الىپ بارادى. قازىرگى كۇنى قاراعاندى وبلىسى بويىنشا قاتەرلى ىسىك دەرتىنە شالدىققاندار سانى 20 مىڭعا جۋىقتادى. اتالعان كورسەتكىشتى ازايتىپ، ناۋقاستارعا كورسەتىلەتىن مەديتسينالىق قىزمەت ساپاسىن ارتتىرۋ ءۇشىن ايماقتا اۋقىمدى جۇمىستار قولعا الىنعان. سونىڭ ءبىرى - گامما- پىشاق.
تاتيانا بوندار، ەم الۋشى - مەن مۇندا گامما- پىشاق بارىن ەستىپ، سوناۋ سولتۇستىك قازاقستان وبلىسىنان ارنايى ەمدەلۋ ءۇشىن كەلدىم. مەندەگى ىسىك جۇيكە جۇيەسىندە پايدا بولعان. سوندىقتان وپەراتسيا جاساتۋدان باس تارتىپ، ەمنىڭ وسى ءتۇرىن قالادىم.
مامانداردىڭ ايتۋىنشا، امبەباپ قوندىرعى ءداستۇرلى تاسىلمەن ەم جۇرگىزۋگە كەلمەيتىن مي، قۇرساق پەن كەۋدە قۋىسىنىڭ قاتەرلى ىسىك اۋرۋلارىن ەمدەيتىن بولادى. ءارى سىرقات اۋرۋحانا توسەگىنە تاڭىلمايدى، وعان امبۋلاتوريالىق قىزمەت كورسەتىلەدى. ەڭ باستىسى، گامما پىشاقتىڭ دەنساۋلىققا ەش زيانى جوق، تەك ىسىككە عانا اسەر ەتەدى.
ناتاليا بوچكوۆا، ونكولوگ- دارىگەر - بۇل تەڭدەسى جوق اپپارات وكپە، باۋىر، ۇلتابارداعى قاتەرلى ىسىكتى دە ەمدەيدى. تەك ناۋقاس اۋرۋىن اسقىندىرىپ الماۋى ءتيىس. ياعني ىسىك 5 سانتيمەتردەن اسپاۋى قاجەت. ەمدەلگەن سىرقات جانداردىڭ 80 پايىزى قۇلان- تازا ساۋىعىپ، اياعىنان تۇرىپ كەتىپ جاتىر.
گامما- پىشاقپەن اي سايىن 50 ناۋقاستى ەمدەۋگە بولادى. زاماناۋي قوندىرعىنىڭ قۇنى 1 ميلليارد تەڭگەدەن اسادى. سونىمەن قاتار گامما- پىشاقتا قازاقستان ازاماتتارى كۆوتا ارقىلى تەگىن ەمدەلە الادى. بۇل زاماناۋي قوندىرعى قىتايدا جاسالعاندىقتان، اسپان استى ەلىنىڭ ونكولوگ- دارىگەرلەرى ءبىزدىڭ ماماندارعا شەبەرلىك ساباعىن وتكىزدى.
khabar.kz
