قازاقستاندا ادام قۇقىقتارىن كوبىنەسە جەكەلەگەن شەنەۋنىكتەر بۇزادى - اسقار شاكىروۆ
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا قازاقستان رەسپۋبليكاسىنداعى ادام قۇقىقتارى جونىندەگى ۋاكىل (ومبۋدسمەن) اسقار شاكىروۆ ءمالىم ەتتى.
«ادام قۇقىقتارىن كوبىنەسە جەكەلەگەن شەنەۋنىكتەر بۇزادى. بۇنداي جاعدايلار كەز كەلگەن سالاداعى كۇندەلىكتى قىزمەتتە ورىن الادى. سوندىقتان دا بەس ينستيتۋتسيونالدى رەفورمالاردا ماڭىزدى اسپەكتىلەردىڭ ءبىرى مەملەكەتتىك اپپاراتتى جەتىلدىرۋ بولىپ تابىلادى. ول مەملەكەت الدىندا تۇرعان مىندەتتەردى العا جىلجىتۋدى ءتيىستى دەڭگەيدە قامتاماسىز ەتۋگە قاۋقارلى. ونىڭ ىشىندە الەمنىڭ دامىعان 30 ەلىنىڭ قاتارىنا ەنۋ قامتىلىپ وتىر»، - دەدى شاكىروۆ تىلشىلەر ساۋالىنا جاۋاپ بەرۋ كەزىندە.
ونىڭ سوزىنە قاراعاندا، بۇگىندە مەملەكەتتىك قىزمەتتەردى ۇسىنباۋ، راسىمدەردى بۇزۋ، سونداي- اق نەمقۇرايلىلىق پەن اۋرە- سارساڭعا سالۋ فاكتىلەرى، لاۋازىمدى تۇلعالاردىڭ ارەكەتسىزدىگى تۋرالى حابارلار ومبۋدسمەن مەكەمەسىنە ازاماتتاردان كەلىپ تۇسەتىن شاعىمدارىنىڭ اراسىندا 14 پايىزىن قۇراپ وتىر. سونىمەن بىرگە ازاماتتار وزدەرىنىڭ ارىزدارىندا كوبىنەسە ناقتى زاڭنامالار مەن حالىقارالىق قۇجاتتار اياسىنداعى قۇقىقتارى تاپتالعاندىعىن اتاپ كورسەتەدى ەكەن.
«الايدا، جەكە لاۋازىمدى تۇلعالار، ياعني بارىنەن بۇرىن جەرگىلىكتى دەڭگەيدەگىلەر ادامداردىڭ ساۋالدارى مەن پروبلەمالارىنا دايەكتى، ناقتى جاۋاپتى ۇسىنۋدىڭ قاجەتتىگىن ەلەيمەيتىندىگى ءجيى كەزدەسەدى»، - دەپ تۇيىندەدى شاكىروۆ.
اۆتور: رۋسلان عابباسوۆ
