استانادا «قىران قاناتىنداعى جىر» پوەزيا كەشى وتەدى
حيۋاز دوسپانوۆا (15.05.1922-21.05.2008 ج ج.) قازىرگى اتىراۋ وبلىسىندا دۇنيەگە كەلگەن.
«ءاليا، مانشۇك، حيۋاز... سۇراپىل سوعىس جىلدارى ەتىك كيگەن ەر ازاماتتارعا بەرگىسىز ەرلىككە بارعان وسىنداي قاراكوز قازاق قىزدارىنىڭ باتىلدىعىن، باتىرلىعىن اسىرەلەپ، اسپەتتەۋدىڭ قاجەتى دە جوق شىعار... ولاردىڭ ەسىمدەرىن تەك قازاقستان عانا ەمەس، كەزىندەگى ك س ر و حالىقتارى دا جاقسى بىلەدى».
ۇشقىشتىق ءومىر جولىن ورالدىڭ اەروكلۋبىندا باستاعان حيۋاز دوسپانوۆا سوعىس جىلدارىندا ايگىلى ۇشقىش مارينا راسكوۆا باسقارعان 46 گۆارديالىق پولكىنىڭ قۇرامىندا بولىپ، 300 دەن استام اۋە شايقاستارىنا قاتىسىپ، تەڭدەسسىز ەرلىگى ءۇشىن «قاناتتى قىز» اتانىپ، اتى اڭىزعا اينالدى. 2004-جىلى ەلباسىمىز ن. ءا. نازاربايەۆتىڭ جارلىعىمەن حيۋاز دوسپانوۆاعا «حالىق قاھارمانى» اتاعى بەرىلدى.
كەشكە استانالىق زيالى قاۋىم وكىلدەرى، اكادەميك مىرزاتاي جولداسبەكوۆ، جازۋشى سۇلتان ورازالين، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەك ۇلى، استانا قالاسى تىلدەردى دامىتۋ باسقارماسىنىڭ باسشىسى ەربول تىلەشوۆ قاتىسادى.
