ق ر پرەزيدەنتى مۇراعاتىندا جۇزگە جەتپەيتىن قۇپيا قۇجات قالدى - مۇراعات ديرەكتورى

استانا. قازاقپارات - ق ر پرەزيدەنتى مۇراعاتىندا جۇزگە جەتپەيتىن قۇپيا قۇجات قالدى. بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر مۇراعاتىنىڭ ديرەكتورى بوريس جاپاروۆ ايتتى.

«ءبىزدىڭ قازىرگى ءومىر ءسۇرىپ وتىرعان زامانىمىزدىڭ باستى ەرەكشەلىگى - قوعامىمىزدىڭ اشىقتىعىندا. سوندىقتان قازىر مۇراعاتتار دا اشىق بولىپ وتىر. وسى تۇرعىدان العاندا، سوڭعى جىلدارى ەلىمىزدىڭ تاريحىنا قاتىستى 1937-1991-جىلداردى قامتيتىن 13 مىڭنان استام قۇجات اشىلدى. سونىمەن قاتار وعان دەيىنگى كەزەڭ، ياعني 1918-1936-جىلدارعا قاتىستى 26 مىڭ ءىس-قۇجات تا تولىعىمەن قۇپيالىلىعىن جويدى»، - دەپ اتاپ ءوتتى ب. جاپاروۆ.

ونىڭ ايتۋىنشا، قازىرگى ۋاقىتتا قۇپيا بولىپ قالعان قۇجاتتار 100 گە جەتپەيدى. ولاردىڭ كوپشىلىككە جاريا بولۋى مەملەكەتتىك قاۋىپسىزدىككە نۇقسان كەلتىرەتىن كورىنەدى.

اۆتور: ءابۋ-اسقار مەكەش ۇلى