ورالدا ورالحان بوكەي اتىنداعى وبلىستىق بايقاۋ مارەگە جەتتى

ورال. قازاقپارات - ب ق و تىلدەردى دامىتۋ باسقارماسىنىڭ قولداۋىمەن كوركەم ءسوز وقۋ شەبەرلەرىنىڭ ورالحان بوكەي اتىنداعى ХVІІ وبلىستىق بايقاۋى مارەگە جەتتى.

م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ماگيستر-وقىتۋشىسى گانميركۇن تۇرعاناليەۆانىڭ حابارلاۋىنشا، اتالمىش بايقاۋدىڭ ماقساتى مەملەكەتتىك ءتىلدىڭ قولدانىلۋ اياسىن كەڭەيتۋ، ءتىل مادەنيەتىن كوتەرۋ، كوركەم ادەبيەتتى ناسيحاتتاۋدى جانداندىرۋ، حالىق اراسىنان تالاپتى، تالانتتى جاستاردى ىزدەپ تابۋ بولاتىن. بايقاۋعا 14 ۇمىتكەر قاتىسىپ، ءۇش تاپسىرما بويىنشا جوعارى دەڭگەيدە ونەر كورسەتتى. ورالحان بوكەيدىڭ «قامشىگەر»، «كەربۇعى»، «ءبارى دە مايدان»، «قايداسىڭ، قاسقا قۇلىنىم»، «ءولىارا» ، «قار قىزى»، «سايتان كوپىر»، «قۇم مىنەز» سىندى پوۆەستەرى، «ءوز وتىڭدى وشىرمە» اتتى رومانى جانە تاعى دا باسقا كوپتەگەن پوۆەستەرى، اڭگىمەلەرىنەن ۇزىندىلەر وقىلدى. سونىمەن قاتار قازاق ادەبيەتىندەگى باسقا دا تۋىندىلاردى شەبەر ورىندادى.

م. وتەمىسوۆ اتىنداعى ب ق م ۋ- دىڭ قاۋىمداستىرىلعان پروفەسسورى، فيلولوگيا عىلىمدارىنىڭ كانديداتى ريتا سۇلتانعاليەۆانىڭ ايتۋىنشا، قازاق ادەبيەتىنىڭ التىن قورىنا ۇلكەن ولجا سالىپ، تىڭ جاڭالىقتارمەن كەلگەن جازۋشى ورالحان بوكەي شىعارماشىعىن ۇعىنا تۇسۋدە مۇنداي شارالاردىڭ ماڭىزى زور.

ءتىل ماماندارى، مادەنيەت سالاسىنىڭ قىزمەتكەرلەرى، جۋرناليستەر قازىلىق ەتكەن بايقاۋدىڭ باس جۇلدەسىن م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى رابينا باتۋوۆا جەڭىپ الدى. ج. دوسمۇحامەدوۆ اتىنداعى پەداگوگيكالىق كوللەدج ستۋدەنتى سامات بايبولاتوۆ ءبىرىنشى، م. وتەمىسوۆ اتىنداعى ب ق م ۋ- دىڭ ستۋدەنتتەرى ناۋرىزبەك لەسوۆ، ايزادا قوڭىرباي سايكەسىنشە ەكىنشى، ءۇشىنشى جۇلدەنى يەلەندى. ارنايى سىيلىق ج. دوسمۇحامەدوۆ اتىنداعى پەدكوللەدج ستۋدەنتى اسەمگۇل بەكەشوۆاعا بەرىلدى. شارا سوڭىندا بارلىق قاتىسۋشىلارعا العىسحاتتار مەن باعالى سىيلىقتار تابىستالدى.

اۆتور: ەلجان ەرالى