قازاقستاندىق تەننيسشى الەمنىڭ ونىنشى راكەتكاسىن جەڭدى

استانا. قازاقپارات - قازاقستاندىق تەننيسشى يۋليا پۋتينتسيەۆا نيۋرنبەرگ قالاسىندا ءوتىپ جاتقان حالىقارالىق تۋرنيردە تابىستى ونەر كورسەتۋدە.

 Vesti.kz سايتىنان الىنعان مالىمەتكە قاراعاندا، ىرىكتەۋ سايىستارىنان كەيىن نەگىزگى جارىسقا جولداما العان 20 جاسار يۋ. پۋتينتسيەۆا ءبىرىنشى اينالىمدا الەمنىڭ ونىنشى راكەتكاسى، نەمىس تەننيسشىسى اندرەا پەتكوۆيچپەن كەزدەستى. ءبىرىنشى پارتيادا 0:5 ەسەبىمەن ۇتىلىپ جاتقان كورت يەسى، وسى تۋرنيردىڭ ءبىرىنشى راكەتكاسى ا. پەتكوۆيچ جارىستى جالعاستىرۋدان باس تارتتى.

دۇنيەجۇزىلىك ساتىدا 105-ورىندا تۇرعان يۋليا وسى ۋاقىت ىشىندە ءۇش برەيك، ءبىر ەيس جاساپ ۇلگەردى. ەندى ول ەكىنشى اينالىمدا گوللانديالىق كيكي بەرتەنسپەن شەبەرلىك بايقاسادى. ال ك. بەرتەنس بىرىنشى كەزدەسۋىندە تاعى ءبىر قازاقستاندىق ياروسلاۆا شۆەدوۆانى جەڭىپ كەتتى.

قازاقستاننىڭ ءبىرىنشى راكەتكاسى، الەمدىك رەيتينگتە وسى اپتادا قايتادان32- ورىنعا كوتەرىلگەن زارينا دياس ءۇشىن فرانسيا ەلىندەگى ستراسبۋرگ تۋرنيرى ساتتى بولا قويمادى. ول العاشقى اينالىمدا الەمنىڭ 46- راكەتكاسى، امەريكاندىق ەليسون ريسكەدەن 5:7, 6:4, 1:6 ەسەبىمەن ءۇش پارتيادا جەڭىلىس تاپتى. بيىل قاڭتار ايىندا اۆستراليانىڭ حوبارت تۋرنيرىندە دە زارينا وسى تەننيسشىدەن ۇتىلعان بولاتىن. ءسويتىپ ول ەسە قايىرا المادى.

جىلدىڭ ەڭ باستى جارىستارىنىڭ ءبىرى سانالاتىن «روللان گارروس» الدىنداعى بۇل ەكى جارىستىڭ دا جۇلدە قورى 250 مىڭ ا ق ش دوللارى ەكەنىن ەسكە سالا كەتەيىك.

اۆتور: ەلجان ەرالى