08:08, 19 - مامىر 2015 | GMT +5
الماتىدا ب. شۇكەنوۆتى ەسكە الۋ كەشى ءوتتى - فوتو
الماتى. قازاقپارات - الماتىداعى رەسپۋبليكا سارايىنداعى «اباي» الاڭىندا ق ر ەڭبەك سىڭىرگەن قايراتكەرى، ءانشى، مۋزىكانت جانە كومپوزيتور باتىرحان شۇكەنوۆتى ەسكە الۋ كەشى ءوتتى.
كونسەرتتىڭ باستالۋىندا ءومىرىنىڭ سوڭعى ۋاقىتىندا باتىرحان شۇكەنوۆ قاتىسقان رەسەي تەلەارنالارىنداعى «ودين ۆ ودين» باعدارلاماسىنان ۇزىندىلەر كورسەتىلدى. وسىدان كەيىن، «ChickFlick» توبى ءانشىنىڭ رەپەرتۋارىندا بولعان بىرنەشە ءاندى ورىندادى. كونسەرتتە «باتىر: Live» فيلمى كورسەتىلدى.
باتىرحان شۇكەنوۆ 53 جاسقا قاراعان جاسىندا ماسكەۋ قالاسىندا جۇرەك تالماسىنان قايتىس بولدى. مۋزىكانتپەن قوشتاسۋ 1- مامىر كۇنى ءبىر كەزدە ورىنداۋشىنىڭ ءوزى شىعارماشىلىق جولىن باستاعان جامبىل اتىنداعى مەملەكەتتىك فيلارمونيا عيماراتىندا ءوتتى. ءدال وسى كۇنى ميتينگىدە الماتى قالاسىنىڭ اكىمى احمەتجان ەسىموۆ ءارتىستىڭ تۋعان كۇنىندە ەسكە الۋ كەشىن وتكىزۋ تۋرالى ۇسىنىس ايتقان بولاتىن.
