رەسەيدە سوعىس جىلدارى كوشىرىلگەندەردىڭ قازاقستان جانە ورتالىق ازيا ەلدەرىنە العىسىن بىلدىرەتىن حالىقارالىق شارا ءوتتى - فوتو
اكسيانىڭ باستى ماقساتى قازاقستان جانە ورتالىق ازيا رەسپۋبليكالارىنا ۇلى وتان سوعىسى كەزىندە كەڭەستىك سوتسياليستىك رەسپۋبليكالار وداعىنىڭ ەۋروپالىق بولىگىنەن كوشىرىلگەندەردى مەيماندوستىقپەن قابىلداعانى ءۇشىن ريزاشىلىق ءبىلدىرۋ بولدى.
اتالعان شاراعا قازاقستان، قىرعىزستان، وزبەكستان، تاجىكستان، تۇرىكمەنستان ەلشىلىكتەرىنىڭ وكىلدەرى، ماسكەۋ وڭىرىندەگى ۇلتتىق دياسپورالار وكىلدەرى جانە كراسنوارمەيسك قالاسىنىڭ سوعىس جىلدارى كوشىرىلگەن تۇرعىندارى قاتىستى.
اكسيا قاتىسۋشىلارى كراسنوارمەيسك قالالىق وكرۋگىنىڭ اكىمى الەكساندر وۆچيننيكوۆپەن كەزدەسىپ، مايداندا قايتىس بولعان كراسنوارمەيسك تۇرعىندارىنا ارنالعان ەسكەرتكىشكە گۇل شوقتارىن قويىپ، «كراسنوارمەيسك - جاۋىنگەرلىك جانە ەڭبەك داڭقىنىڭ قالاسى» مۇراجاي-ەكسپوزيتسياسىن تاماشالادى.
شارا ورتالىق ازيا ەلدەرىنىڭ قوناقجايلىلىق داستۇرىندە سالتاناتتى قوناقاسىمەن ءتامامدالدى.
«باسپانا بەرگەندەرگە تاعزىم ەتۋ» اكسياسى كراسنوارمەيسك قاۋىمداستىعىنىڭ باستاماسىمەن وتەدى. ول العاش 2012-جىلى تۇسكى قوناقاسى رەتىندە ۇيىمداستىرىلىپ، كەيىن ونى جۇيەلى تۇردە وتكىزۋ تۋرالى شەشىم قابىلداندى. بۇل - سوعىستىڭ قيىن-قىستاۋ جىلدارى ورتالىق ازياعا كوشىرىلگەن حالىقتارعا جەرگىلىكتى ەل قوناقجايلىلىق كورسەتىپ، رياسىز جاردەم بەرگەنى ءۇشىن العىس ءبىلدىرۋ ءۇشىن رەسەيدە جىل سايىن وتكىزىلەتىن بىردەن-ءبىر شارا.
