ستالين قۇلاعان كۇن
بۇل اۋىلدا سوۆەت زامانىندا تۇرعىزىلعان ستاليننىڭ تاس ءمۇسىنى 2014 - جىلعا دەيىن تۇرعان. سول جىلى قاتتى داۋىل بولىپ، تاريحي ادىلدىكتى تابيعاتتىڭ ءوزى ورناتىپ، قىزىلداردىڭ قاندى قول كوسەمىنىڭ ەسكەرتكىشىن قۇلاتىپ كەتكەن ەدى.
ستالين سول قۇلاعاننان تۇرماس ەدى.. . ءبىراق، قۇلدىق سانا ءوز دەگەنىن ىستەتتى! وتكەن اپتادا يقان اۋىلىنداعى باياعى قىزىلكوز بەلسەندىلىكتەرى ءالى دە سانالارىندا بىقسىپ جاتقان ءبىر توپ بۇرىنعى كوممۋنيستتەر ەسكەرتكىشتى قالپىنا كەلتىرىپ، ورناتىپ ۇلگەرگەن. الايدا، جەرگىلىكتى بيلىكتىڭ ارالاسۋىمەن بۇگىن ستاليننىڭ تاس ءمۇسىنىن بولشەكتەپ تۇرىپ، الىپ تاستادى. بۇل حابار ەل ىشىنە لەزدە تاراپ، الەۋمەتتىك جەلى ارقىلى الاششىل ازاماتتار سۇيىنشىلەپ جاتىر.
بۇل جاڭالىق قىزىلكوز بەلسەندىلىكتىڭ داۋرەنى وتكەنىن، زامان، قوعام، قازاق بالاسى جاڭارعانىن ەسكىگە، سونىڭ ىشىندە قازاققا قانقاساپ ۇلى قىرعىن جاساعان ستالينگە جانە وعان تابىنۋشىلارعا بۇگىنگى قازاقستاندا ورىن جوقتىعىن انىق كورسەتتى. دەمەك، وزگە ەلدەگى ستالينشىلەرگە دە جول جابىق!
وڭتۇستىك قازاقستان وبلىسىنداعى اتقامىنەر، قىزمەتتەگى الاششىل ازاماتتار جاراپ- اق تۇر! مۇنىڭ الدىندا جەگى قۇرتتاي قوعامدى كەمىرگەن، داۋعا ۇلاسقان گەورگيي لەنتاسىنىڭ ورىنا ويۋلى كوك ءتۇستى ۇزىن لەنتانى شەرۋلەتىپ شىمكەنت كوشەسىمەن الىپ ءجۇرۋ ارقىلى وزگە ايماقتارعا تاعى دا ونەگە كورسەتىپ، رەسەيشىل توپتاردىڭ ساعىن سىندىرعان ەدى. ەندى، مىنە، ستاليننىڭ ەسكەرتكىشىن قۇلاتتى. اتالعان ىستەر سىرت قاراعاندا، ءبىر وبلىستىڭ كولەمىندە عانا بولىپ جاتقان سىقىلدى كورىنگەنىمەن، بىلگەن جانعا مۇنىڭ استارىندا مەملەكەتتىك، ۇلتتىق ماڭىزى بار شارۋانىڭ اعىنى جاتىر.
وزگە ايماقتار مەن قالالار وڭتۇستىكتەن ۇلگى الار دەگەن ءۇمىت بار.. .
Abai.kz
