قازاقستاننىڭ مەكتەپ وقۋلىقتارى نەگىزىنەن قىتاي مەن تۇركيادا باسىپ شىعارىلادى - ا. ءسارىنجىپوۆ

 استانا. قازاقپارات - قازاقستاننىڭ مەكتەپ وقۋلىقتارى نەگىزىنەن قىتاي مەن تۇركيادا باسىپ شىعارىلادى. ويتكەنى اتالعان ەلدەردە وقۋلىق باسىپ شىعارۋ اناعۇرلىم ارزان.

 بۇل تۋرالى بۇگىن ماجىلىستە وقۋلىقتاردىڭ ساپاسى جانە ءبىلىم بەرۋ ۇيىمدارىن وقۋلىقتارمەن قامتاماسىز ەتۋگە ارنالعان ۇكىمەت ساعاتىندا ءبىلىم جانە عىلىم ءمينيسترى اسلان ءسارىنجىپوۆ مالىمدەدى.

 «جالپى، ەلىمىزدەگى وقۋلىقتاردى ازىرلەۋ قازاقستاندا جۇزەگە اسىرىلادى، ال باسىپ شىعارۋ شەتەلدەردە جۇزەگە اسىرىلىپ جاتىر. بۇل نەگىزى بيزنەستىڭ (نارىقتىڭ) ماسەلەسى. ويتكەنى، قاي جەردە باعا ارزان بولسا، بيزنەس سول جەرگە بارىپ كىتاپ باسىپ شىعارادى»، - دەدى ا. ءسارىنجىپوۆ.

 ونىڭ سوزىنە قاراعاندا، وقۋلىقتى باسىپ شىعارۋعا ونىڭ جالپى قۇنىنىڭ 5-10 پايىزى كەتەدى. ال نەگىزگى سوما اۆتورلىق جۇمىستارعا، ديزاينعا جانە ادىستەمەلىككە جۇمسالادى.

 بۇدان بولەك، ۆەدومستۆو باسشىسى وقۋلىقتى ازىرلەۋمەن نەگىزىنەن باسپالار اينالىساتىنىن، ال مينيسترلىك ولاردا باعا قالاي قالىپتاساتىنىنان حاباردار ەمەس ەكەنىن العا تارتادى. ويتكەنى، ءمينيستردىڭ ايتۋىنشا، بۇل جەكە بيزنەس بولىپ سانالادى.

«ايتا كەتەيىك، ءبىز ءوزىمىزدىڭ بالاما وقۋلىعىمىزدى - «قازاق ءتىلى» وقۋلىعىن شىعاردىق. وعان اۆتورلىق ۇجىمدى ءوزىمىز تارتتىق، وسىنداي بىرەگەي وقۋلىقتى ەندى سىناقتان وتكىزۋدى دە جوسپارلايمىز. جالپى، وسى وقۋلىقتى شىعارۋ ءۇشىن مينيسترلىك 70 ميلليون تەڭگە شىعىندادى»، - دەدى ا. ءسارىنجىپوۆ.

اۆتور: قانات مامەتقازى ۇلى