فيلمدى تۇسىرمەي تۇرىپ، قۇنانباي بابامىزدىڭ اسىن بەردىك - د. جولجاقسىنوۆ
ياعني، ءتۇسىرىلىم توبى قۇنانبايدىڭ باسىنا بارىپ، قۇران باعىشتاپ، اسىن بەرگەن. ارتىنان بايگەسىن وتكىزگەن. بۇل تۋرالى دوسحان جولجاقسىنوۆ كورسەتىلىمنەن كەيىنگى بريفينگتە ءمالىم ەتتى، دەپ حابارلايدى BNews.kz ءتىلشىسى.
«ارينە، قۇنانبايدى اۋزىمىزعا العاندا، الدىمىزدا جارتاستاي مۇقاڭ (مۇحتار اۋەزوۆ) تۇراتىنى حاق. دەيتۇرعانمەن، تۇعىرىمىز مۇقاڭ بولعانىمەن، ءبىز ءوز جولىمىزدى ىزدەدىك. ويتكەنى، فيلم قۇنانباي دەپ اتالعاننان كەيىن، قۇنانبايدىڭ پەندەۋي جاعىن الۋعا تىرىستىق. نەگىزى، ءتۇسىرىلىم سول اباي اۋدانى، قاراۋىل اۋىلىندا ءوتتى. سول اۋىلداعى قاراشوقى، اقشوقى ماڭايىندا ءوتتى. بۇل كيەلى دە قاسيەتتى جەرلەر. سول جەردەگى بۇكىل حالىق كوپشىلىك ساحناسىنا ءتۇستى. سول كەزدە وبلىستى (شىعىس قازاقستان وبلىسى) باسقارعان قازاقتىڭ ءبىرتۋار ازاماتى بەردىبەك ساپاربايەۆتىڭ كومەگىمەن، اۋدان اكىمىنىڭ كومەگىمەن جانە حالىقتىڭ كومەگىمەن فيلمدى ءتۇسىرىپ شىقتىق»، - دەيدى فيلم رەجيسسەرى ءارى قۇنانباي ءرولىن سومداعان د. جولجاقسىنوۆ.
جالپى، رەجيسسەردىڭ ايتۋىنشا، فيلم 1 اي 18 كۇن شاماسىندا ءتۇسىرىلىپ شىققان. قازاق ادەبيەتىنىڭ تاريحىنداعى ەمەس، تۇتاس حالىق تاريحىنداعى ءىرى تۇلعا قۇنانباي تۋرالى تۋىندىنى ءتۇسىرۋ وڭاي بولماعانى انىق. سوندىقتان، ءىستى باستاماس بۇرىن ءتۇسىرىلىم توبى قۇنانباي اتامىزعا اس بەرىپ، قۇران وقىتقان.
«شىنى كەرەك، ءفيلمدى تۇسىرمەس بۇرىن، ءارۋاقتان رۇقسات سۇراۋ ءبىزدىڭ مىندەتىمىز بولدى. سوندىقتان، قۇنانباي بابامىزدىڭ اقشوقىداعى باسىنا بارىپ، تۋ بيە سويىپ، اسىن بەردىك. اباي اۋدانىنىڭ ورتالىعىندا بايگەسىن وتكىزدىك. وسىنىڭ بارلىعى حالىق ءۇشىن، ءبىز ءۇشىن ۇلكەن باستاما بولدى. وسىنداي شارالاردان كەيىن عانا فيلمدى ءتۇسىرۋدى قولعا الدىق. كينونى ءبىر اي، ون سەگىز كۇندە ءتۇسىرىپ شىقتىق. وعان ءوزىمىز دە تاڭ قالدىق.. .»، - دەيدى د. جولجاقسىنوۆ.
كەنجەكەي توقتامۇرات
