قازاقستاندا قاتەرلى ىسىكتەردى انىقتايتىن ارناۋلى باعدارلامالار جۇمىس ىستەيدى - مامان
بۇل تۋرالى بۇگىن مەلانومامەن كۇرەس كۇنىنە ورايلاستىرىلىپ وتكىزىلگەن ونكولوگتار كونفەرەنتسياسى بارىسىندا ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باس دەرماتوۆەنەرولوگى، «قازاقستان دەرماتوۆەنەرولوگتارى مەن دەرماتوكوسمەتولوگتارى قاۋىمداستىعىنىڭ» پرەزيدەنتى گۇلنار باتپەنوۆا ايتتى.
«رەسپۋبليكادا ونكولوگيالىق اۋرۋلارمەن كۇرەسكە ۇلكەن كوڭىل بولىنگەن. ەرتە كەزەڭدەرىندە قاتەرلى ىسىكتەردى انىقتاۋعا مۇمكىندىك بەرەتىن ءبىرقاتار سكرينينگتەردى قوسقاندا، ارناۋلى باعدارلامالار جۇمىس ىستەيدى»، - دەپ اتاپ ءوتتى مامان.
ونىڭ ايتۋىنشا، ونكولوگقا ۋاقىتىلى قارالىپ، اۋرۋدى مۇقيات ەمدەگەن جاعدايدا، تەرىدە پايدا بولاتىن قاتەرلى ىسىككە شالدىققان ناۋقاستاردىڭ 95 پايىزىن تولىقتاي ەمدەۋگە بولادى.
«وسى جايتتاردى ەسكەرە وتىرىپ، ەڭ ماڭىزدىسى - اۋرۋدى ەرتە اڭعارىپ، تەرىدەگى اۋرۋلاردىڭ الدىن الىپ، قاتەرلى وسكىندەرگە جول بەرمەۋ ەكەندىگىن تۇسىنگەن ابزال»، - دەيدى باس دەرماتوۆەنەرولوگ.
اۆتور: ءابۋ- اسقار مەكەش ۇلى
