د. امانتاي: «قۇنانباي» - ۇلتتىق اۋقىمداعى فيلم

استانا. قازاقپارات - بۇگىن «قازمەديا» ورتالىعىندا قازاقتىڭ ۇلى اقىنى ابايدىڭ اكەسى - قۇنانباي وسكەنباي ۇلىنىڭ ونەگەلى ومىرىنەن سىر شەرتەتىن «قۇنانباي» تاريحي فيلمى بۇقارالىق اقپارات قۇرالدارى ءۇشىن ارنايى كورسەتىلدى.

«وزدەرىڭىزگە بەلگىلى، قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى «قۇنانباي» تۋىندىسىن جارىققا شىعاردى. فيلمنىڭ رەجيسسەرى قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى دوسقان جولجاقسىنوۆ»، - دەدى بۇگىن فيلم كورسەتىلىمىنەن كەيىنگى بريفينگتە «قازاق فيلمنىڭ» ۆيتسە-پرەزيدەنتى، باس رەداكتورى ديدار امانتاي.

ونىڭ اتاپ وتۋىنشە، قۇنانباي وبرازى - وتە كۇردەلى وبراز. ول ورىستىڭ نيزامىن، دالا ءتارتىبىن جانە شاريعات جولىن قاتار ۇستانعان، ەل باسقارعان، قازاقتى ىلگەرى وزدىرامىن، ەل قىلامىن دەپ ەڭبەك ەتكەن اياۋلى تۇلعا.

«قۇنانباي وبرازى مۇحتار اۋەزوۆتىڭ «اباي جولى» رومانىنان كورىنەدى. ءبىراق، دوسقان اعامىزدىڭ فيلمى «اباي جولىنىڭ» جەلىسى بويىنشا ەمەس، قۇنانباي تۋرالى دەرەكتەردەن قۇرالعان سەناري. بۇل - ۇلتتىق اۋقىمداعى فيلم. بۇل رومانتيكالىق سارىنداعى ساعىنىشقا تولى فيلم. بۇل - دالانىڭ سول كەزدەگى الماعايىپ زاماندا، جاۋگەرشىلىك ءداۋىرى اياقتالىپ، قازاقتىڭ جاڭا زامانعا اياق باسقان كەزىندەگى ابايدىڭ ءداۋىرىن ايقىندايتىن فيلم»، - دەدى ول.

اۆتور: مارلان جيەمباي