ەرماحان شايحى ۇلى. جاتىپ اتار
استانا . قازاقپارات - ... ەكەۋ ءبىر- بىرىنە مۇڭىن شاعىپ وتىر. ءبىر كەزدە بىرەۋى ءارى قاراي شىدامادى- اۋ شاماسى، قاتتى- قاتتى ۇرۋگە كوشتى.
سول كەزدە ەكىنشىسى ۇلي باستاپ ەدى، قاسىنداعىسى قۇيرىعىن بۇتىنا قىسىپ، جىم بولا قويدى. ءسويتتى دە جايلاپ اياڭداي باستادى.
كورىمدىك
- قويۋ قارا بۇلت ىدىراي باستادى. ەندى كوك كورىنىپ تە قالار. كورىمدىگىمدى بەر، - دەگەن كوك مايساعا:
- كورىمدىككە كۇننىڭ كوزى، - دەپتى سامال.
تالاس
- مەنىڭ ءبىراز جەرگە شامام جەتەدى، - دەپتى جارىق.
- مەنىڭ دە ءبىراز جەرگە شامام جەتەدى، - دەپتى قاراڭعى دا، ەكەۋى ءبىرىن- ءبىرى جەڭە الماي.
- بوسقا تالاسىپ قايتەسىڭدەر.. . ەكەۋىڭ دە كەرەكسىڭدەر، - دەپتى ۋاقىت.
ءومىردىڭ ءمانى
- قوعام مەنى لاقتىرىپ تاستادى عوي، - دەگەن عىلىمعا:
- ءبارىبىر سەنسىز ءومىردىڭ ءمانى بولماس، - دەگەن ەكەن سوندا، ونەركاسىپ ءونىمىنىڭ ساپا بەلگىسى الداعى ۋاقىتتى مەڭزەپ.
ونەگە
- كەتشى، ەي ءارى. بۇل جەرگە قايدان كەلدىڭ؟ تەكسىز نەمە، - دەپ جاعادا تۇرعان قايىق جاعالاۋعا كەلىپ توقتاعان گازيك اۆتوكولىگىنە كەيىستىك ءبىلدىرىپتى.
ۇزاماي، قايىق سۋ بەتىنە شىعىپ كەتتى.
ال كولىكتىڭ سوڭىندا كەلەشەك ۇرپاققا دەگەن ونەگەلى جولى قالا بەرگەن ەدى.
ماڭگىلىك جاراس
- ال كەتتىك! - دەگەن تىلگە:
- قانە، باستا، - دەپتى ساعات تا. ءبىراق ەكەۋى دە ءالى ۋاقىت اتتى مارەگە جەتە قويماپتى، الداعى.
ۇشەۋدىڭ كۇرسىنىسى
بالا قولىنا ۇيالى تەلەفونىن العان ەدى.
- ءبىزدىڭ كۇنىمىز نە بولار ەكەن، ا؟ - دەپتى اسىق دوپقا قاراپ.
- قايدان بىلەيىن.. . - دەپتى دوپ تا اۋىر كۇرسىنىپ.
- ە.. . سەندەر بىزگە قاراعاندا قايتا شۇكىرسىڭدەر عوي - دەپتى كىتاپ مۇڭايىپ.
ۇشەۋىنىڭ دە ەندى تەك، ۋاقىتقا جۇگىنۋدەن باسقا امالدارى قالماعان ەدى.
ۇشەۋدىڭ قۇدىرەتى
- كوز كورەتىنىن، قۇلاق ەستيتىنىن، ءتىل سەزەتىنىن قويار ەمەس. بۇلارعا قايتپەك كەرەك؟ - دەگەن باسقا:
- تىيىپ قايتەسىڭ؟ ! بۇلار سونىسىمەن قۇدىرەتتى عوي. تەك، ۇشەۋىن ورىنىمەن پايدالانا بىلسەيشى، باۋىرىم- اۋ، - دەپتى مي.
ارمان
كۇننەن- كۇنگە، بويجەتىپ، - سىلاڭدانىپ وسە تۇسكەن قايىڭدى كورىپ:
- شىركىن، وسى كورىكتى ماعان بەرسە عوي، - دەپ ارمانداپتى تومار.
سايگۇلىك ەدى
مىنىستەگى كارى ات، كۇنى ءوتىپ، قورا شەتىندەگى شىدەرلەۋلى تۇرعان زامانداسى جونىندە:
- تالايدى تاڭعالدىرعان تارلان بوز ەدى، - دەپ سايگۇلىكتى سىرتىنان مەڭزەپتى قۇلىنعا قاراپ.
امانات جۇگى
بىردە:
- ءبىراز كۇن دامدەس بولدىق. سىرلاستىق. يشاي دەسكەن كۇنىمىز بولماپتى. ساۋ بولىپ تۇر، - دەپتى اعاشقا سارى جاپىراق، بۇتاقتى كەلەسى جاپىراققا اماناتتاپ.
تاڭدانۋ
- و، مىنانى قاراڭدار. بۇل كىم ءوزى؟ - دەپتى جاعاداعى شالشىق سۋدا جۇرگەن جىلقىشى قۇستىڭ ءبىرى ەكىنشىسىنە، كامىس اراسىنان شىققان اققۋدى كورىپ.. .
دەگەن ەكەن.. .
جازدا كونكي تەۋىپ جۇرگەن بالالاردى كورىپ:
- شىركىن، ءومىر وسىلاردىكى بولىپ تۇر عوي، - دەگەن ەكەن، «رامستور» ساۋدا ورتالىعىنىڭ ىشىندەگى ءبىر ەلەۋسىزدەۋ جەردە تۇرىپ اسىق.
شۋاق كۇشى
تاسىر - بۇرشاق كوكتەن ەكىلەنە تۇسە بەرىپتى.
.. .جەر تىڭداسىن با:
- وي، ساعان نە بولدى؟ دوكىر ەكەنسىڭ عوي، - دەپتى. «قوي بولماس.. .» دەپ ەكەۋىنىڭ ءسوزىن ەستي سالا، كۇن، شۋاعىن توگە سالعانى سول- اق، بۇرشاق، ەرىپ سالا بەرگەن ەكەن، دەيدى سوندا.
سىرتتاي تانىستىرۋ
- وسىنى دا تانىمايسىڭ با؟ ينە عوي، - دەپتى قىزعالداققا، ەسەك ميا شەڭگەلدى سىرتتاي تانىستىرىپ جاتىپ.
ەرماحان شايحى ۇلى
«ايقىن»
