بيىل «قازاقستان بارىسىنا» قاتىساتىن اتىراۋ الىپتارى انىقتالدى

استانا. قازاقپارات - قازاق كۇرەسىنەن بيىل بەسىنشى رەت وتكەلى جاتقان «قازاقستان بارىسى» رەسپۋبليكالىق تۋرنيرىندە اتىراۋ ءوڭىرىنىڭ نامىسىن قورعايتىن بالۋاندار بەلگىلى بولدى.

قازاقستان رەسپۋبليكاسى پرەزيدەنتىنىڭ جۇلدەسى ءۇشىن قازاق كۇرەسىنەن «قازاقستان بارىسى» رەسپۋبليكالىق V تۋرنيرىنىڭ اتىراۋ وبلىسىنداعى ىرىكتەۋ جارىستارىنىڭ Ⅲ كەزەڭى كەشە «اتىراۋ» سپورت كەشەنىندە ءوتتى.

الىپ بالۋانداردى انىقتاعان شەشۋشى كەزەڭگە 16 بالۋان قاتىستى. ناتيجەسىندە يندەر اۋدانى اتىنان شىققان سۇڭعات زاكاريايەۆ جەڭىمپاز اتاندى. «قازاقستان بارىسىنىڭ» ەكىنشى جولداماسىن اتىراۋ قالاسى اتىنان بەلدەسكەن تابيعات ماعاۋيا ۇلى يەلەندى.

وتكەن جىلى «قازاقستان بارىسى» دوداسىندا اتىراۋ اتىنان سۇڭعات زاكاريايەۆ پەن بەكبولات سالىقوۆ قاتىسقان بولاتىن. ەكەۋى دە ءبىرىنشى اينالىمنان كەيىن جارىستى اياقتاعان ەدى.

ايتا كەتەيىك، «قازاقستان بارىسىنىڭ» رەسپۋبليكالىق شەشۋشى كەزەڭىندە باق سىنايتىن بالۋاندار اراسىندا 2015-جىلدىڭ 19-23- مامىر ارالىعىندا الماتى قالاسىندا وقۋ-جاتتىعۋ جيىنى وتكىزىلەدى. جيىن بارىسىندا بالۋاندار تەرەڭدەتىلگەن مەديتسينالىق تەكسەرۋدەن جانە دوپينگتىك باقىلاۋدان وتەدى.

قازاق كۇرەسىنەن «قازاقستان بارىسى» رەسپۋبليكالىق تۋرنيرى بيىل شىلدە ايىنىڭ 5 ىندە استانا قالاسىنداعى «سارىارقا» ۆەلوترەگىندە وتەتىن بولادى. الداعى ۋاقىتتا وزگە وبلىستاردان دا ۇزدىك شىققاندار انىقتالادى.