قىزىلوردالىق اقىلبەك ەردان الەم چەمپيوناتىندا ەل نامىسىن قورعايدى
40 مەملەكەتتەن مىقتى سپورتشىلار قاتىسقان تارتىستى جارىس باسەكەسىندە ول ەلىمىزدىڭ نامىسىن ابىرويمەن قورعاپ، تامىز ايىندا بوسنيا مەن گەرتسەگوۆينادا بولاتىن الەم چەمپيوناتىنا جولاداما الدى.
ول 1998-جىلى جالاعاش اۋدانىندا دۇنيەگە كەلگەن. ول بۇعان دەيىن قازاقستان رەسپۋبليكاسى چەمپيوناتىنىڭ 2 رەت كۇمىس جۇلدەسىن يەلەنگەن، مەكتەپ وقۋشىلار اراسىندا ق ر سپارتاكياداسىنىڭ جۇلدەگەرى، سپورت شەبەرىنە ۇمىتكەر.
بيىلعى جىلى ۇلتتىق قۇراما كوماندا ساپىنا قابىلداندى. ايتا كەتەرلىگى، بۇل ونىڭ حالىقارالىق جارىستاعى العاشقى جەتىستىگى. جاس پالۋان اقىلبەك ەرداننىڭ الار اسۋى الدا. ونىڭ ونەرىن شىڭداي ءتۇسىپ، الداعى ۋاقىتتا سىر ەلىنىڭ اتىن شىعارار اتاقتى سپورتشى بولاتىنىنا سەنىمىمىز مول.
دزيۋدودان جاسوسپىرىمدەر قۇراماسىنىڭ اعا جاتتىقتىرۋشىسى ارمان مولداحانوۆتىڭ ايتۋىنشا، 5-9- تامىز ارالىعىندا بوسنيا مەن گەرتسەگوۆينانىڭ سارايەۆو قالاسىندا بولاتىن الەم چەمپيوناتىنا اقىلبەكپەن بىرگە جانقوجا مارات، دامير ابدەكوۆ جانە سىمبات تورەندەر ەلىمىزدىڭ نامىسىن قورعايتىن بولادى.
