تانىمال تۇرىك اكتەرى استاناعا كەلەدى

استانا. قازاقپارات - «ماحابباتىم ساعان ۇقسايدى» فيلمىنىڭ تۇساۋكەسەرى شەڭبەرىندە تانىمال تۇرىك اكتەرى، بۇرىنعى مودەل بۋراك وزچيۆيت استاناعا كەلەتىن بولدى.

«سۇلتان سۇلەيمان» تەلەحيكاياسىندا مالكوچوگلۋ بالي بەي ءرولىن سومداعاننان كەيىن وزچيۆيت قازاقستاندىق كورەرمەندەردىڭ سۇيىكتى كەيىپكەرىنە اينالدى.

23- مامىر كۇنى «ارمان 3D ازيا پارك استانا» كينوتەاترىنداعى گالا-كەشتەن كەيىن بۋراك وزچيۆيت «قازاقستان» تەلەارناسىنىڭ ءتۇسىرىلىم الاڭىنا كەلىپ، «تۇنگى ستۋديادا نۇرلان قويانبايەۆ» تانىمال تۇنگى شوۋىنىڭ قوناعى بولادى. اكتەردىڭ قاتىسۋىمەن وتكەن باعدارلاما «قازاقستان» تەلەارناسىنىڭ ەفيرىندە 26- مامىر كۇنى ساعات 23.30 دا شىعادى.

بۋراك - تانىمال اكتەر، بۇدان بۇرىن مودەل بولعان. 2005-جىلى تۇرىكتىڭ ۇلتتىق «Best Model Of Turkey» اتتى سۇلۋلىق سايىسىنىڭ جەڭىمپازى اتانىپ، ەرلەر اراسىنداعى «Best Model Of The World» سايىسىندا جۇلدەلى ەكىنشى ورىندى يەلەنەدى. شىعارماشىلىق جولىنىڭ باسىندا بۋراك ەۋروپانىڭ تانىمال برەندتەرىن جارنامالادى. 2014-جىلى ستامبۋل قالاسىندا ءوزىنىڭ «Balibey Döner» اتتى جەكە مەيرامحاناسىن اشتى.