قازاقستاندىق اسكەري تەڭىزشىلەر زىمىراندى-ارتيللەريالىق كەمەنىڭ اسكەري مۇمكىندىگىن سىنادى - فوتو

استانا. قازاقپارات - قازاقستاندىق اسكەري تەڭىزشىلەر «قازاقستان»، «ورال»، جانە «سارى ارقا» زىمىراندى-ارتيللەريالىق كەمەلەرىنىڭ جاۋىنگەرلىك مۇمكىندىكتەرىن سىنادى. ونىڭ اياسىندا كاسپي تەڭىزىندە ق ر ق ك اسكەري-تەڭىز كۇشتەرىنىڭ اۋقىمدى جاتتىعۋى ورىستەتىلدى.

ءبىرقاتار ارتيللەريالىق كەمەلەرمەن سۋ ۇستىندەگى، اۋەگە باعىتتالعان جانە سۋ مينالارىن زاقىمداۋدى سىنادى. ەكيپاجدار جيناقىلىققا ەرەكشە كوڭىل بولە وتىرىپ جوعارعى دالدىكپەن ورىندادى. ءدال وسىنداي تاپسىرمالاردى اسكەري تەڭىزشىلەر بيىل جازدا كاسپي تەڭىزىندە وتەتىن «كاسپيي تەڭىزى-2015» بايقاۋىندا ورىندايتىن بولادى.

اتالعان جارىستا ءبىزدىڭ اسكەري قىزمەتشىلەرىمىزدىڭ شىنايى قارسىلاسى تۇركىمەنستان، رەسەي جانە ازەربايجان تەڭىز جاياۋ اسكەرلەرىنىڭ ۇزدىك تەڭىزشىلەرى مەن بولىمشەلەرى بولماق. وسىنى ەسكەرە وتىرىپ قازاقستاندىق اسكەري كەمەلەرىنىڭ ەكيپاجدارى مەن تەڭىز جاياۋ اسكەرلەرىنىڭ بولىمشەلەرى تەڭىز بياتلونىنىڭ بارلىق باعىتتارىندا بەلسەندى دايارلىق وتكىزۋدە.

بۇگىنگى كۇنى ولار تەڭىز جاعاسىندا جانە سۋ جولىنداعى قاۋىپتەر ارقىلى ءجۇزۋدى، كەمەدەگى ياكوردى 30-40 مەترگە ورناتۋ، مسس-65 حالىقارالىق جيىن دابىلىنا سايكەس جارىق جانە جالاۋ ارقىلى بەلگى بەرۋ جانە قابىلداۋ، سونداي-اق بورتتا قالىپ قويعان ادامدى قۇتقارۋ بويىنشا شارالاردى پىسىقتادى.

Baq.kz