ۇلان-باتىردا باس قوسقان عالىمدار قازاقستان مەن موڭعوليا تاريحىنىڭ وزەكتى ماسەلەلەرى مەن ءوزارا ساباقتاستىعىن تالقىلادى - فوتو
شارا بارىسىندا قازاق حاندىعىنىڭ قۇرىلۋى تاريحىنىڭ نەگىزگى اسپەكتىلەرى تالقىلانىپ، قازاقستان مەن موڭعوليا مەملەكەتتەرىنىڭ دامۋ تاريحى، سونداي-اق بولاشاق ۇرپاق ءۇشىن ۇلتتىق بىرلىكتى ساقتاۋ ماسەلەلەرى تۋرالى پىكىرلەر الماسىلدى، دەپ حابارلايدى قازاقستاننىڭ موڭعولياداعى ەلشىلىگىنىڭ باسپا ءسوز قىزمەتىنەن.
دوڭگەلەك ۇستەل جۇمىسىنا ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى تاريح عىلىمدارىنىڭ دوكتورلارى، پروفەسسور ت. جۇماعۇلوۆ پەن گ. مەڭدىقۇلوۆا، موڭعوليانىڭ عىلىمي-زەرتتەۋ مەكەمەلەرىنىڭ، سونداي-اق جەرگىلىكتى ب ا ق وكىلدەرى قاتىستى.
ەلشى ق. قوبلاندين شارانىڭ اتالعان مەملەكەتتەر تاريحىن تەرەڭىرەك زەرتتەۋدەگى الار ورنىنا توقتالا وتىرىپ، قازاق حاندىعىنىڭ 550 جىلدىعى ماسەلەلەرىندە تۇركى-موڭعول يمپەرياسى، التىن وردا جانە قازاق حاندىعى تۇرعىسىنان قازاق-موڭعول تاريحي ساباقتاستىعىنىڭ ماڭىزدىلىعىن اتاپ ءوتتى.
موڭعوليا عىلىم اكادەمياسىنىڭ جانىنداعى حالىقارالىق قاتىناستار ينستيتۋتىنىڭ ديرەكتورى ج. باياساح اتالعان شارالاردىڭ ۇيىمداستىرىلۋى قازاق تاريحى، جالپى موڭعول- قازاق تاريحىنىڭ دامۋى تۋرالى تۇسىنىكتى كەڭەيتەتىندىگىنە توقتالدى. ونىڭ پىكىرىنشە، بۇل شارالار ەكى ەل اراسىنداعى گۋمانيتارلىق-مادەني سالالارداعى قارىم-قاتىناستاردىڭ ىلگەرىلەۋىنە وڭ ىقپالىن تيگىزبەك.
موڭعوليا مەملەكەتتىك ۇلى حۋرالى (پارلامەنت) دەپۋتاتى ا. باكەي قازاق حاندىعىنىڭ 550 جىلدىعى اياسىنداعى شارانىڭ ماڭىزدىلىعىنا توقتالا كەلە، تاريحى تەرەڭنەن باستالاتىن موڭعول-قازاق قوعامىنىڭ قاتىناستارىنىڭ نەگىزىندە قازىرگى تاڭدا بەرىك ەكونوميكالىق، عىلىمي، مادەني جانە رۋحاني بايلانىستاردىڭ تۇراقتى تۇردە دامۋدا ەكەندىگىن اتاپ ءوتتى.
تاريح عىلىمدارىنىڭ دوكتورى و. باتسايحاننىڭ قازاقتىڭ ءبىرتۋار ۇلى، پارتيا جانە مەملەكەت قايراتكەرى تۇرار رىسقۇلوۆ تۋرالى بىلدىرگەن پىكىرى قاتىسۋشىلاردىڭ نازارىن اۋداردى. موڭعول عالىمى ت. رىسقۇلوۆتىڭ باستاماسىمەن موڭعوليا استاناسىنىڭ ۇلان-باتىر (اۋدارماسى - قىزىل باتىر) اتالعانىنا نازار اۋدارا وتىرىپ، موڭعوليا مەملەكەتى تاريحىنداعى ونىڭ الاتىن رولىنە اسا جوعارى باعا بەردى.
دوڭگەلەك ۇستەل ناتيجەسىندە ەكى ەلدىڭ عىلىمي توپ وكىلدەرى شارانىڭ قازاقستان مەن موڭعوليا تاريحىنىڭ وزەكتى ماسەلەلەرىن تالقىلاۋدا پايدالى الاڭ بولعاندىعى تۋرالى ورتاق پىكىرگە كەلدى. اتالعان سىندارلى جانە جان-جاقتى تالداۋلار مەملەكەتتەر اراسىنداعى دوستىق پەن ءوزارا سەنىم نەگىزىندەگى قارىم-قاتىناستاردىڭ ودان ءارى ىلگەرىلەپ، دامۋىنا يگى ىقپالىن تيگىزەتىندىگى تۋرالى قورىتىندى جاسالدى.
