استانادا «قازاق حالقىنىڭ سالت- داستۇرلەرى» كىتابى تانىستىرىلدى - فوتو

استانا. قازاقپارات - بۇگىن قازاقستان رەسپۋبليكاسىنىڭ تۇڭعىش پرەزيدەنتى - ەلباسى كىتاپحاناسىندا قازاقستاندىق بەلگىلى سۋرەتشى- گرافيك ەرالى وسپان ۇلىنىڭ «قازاق حالقىنىڭ سالت- داستۇرلەرى» كىتابىنىڭ تانىستىرىلىمى ءوتتى.

 بۇل تۋرالى كىتاپحانانىڭ باسپا ءسوز قىزمەتى حابارلادى.

مەملەكەتىمىز رۋحانيات سالاسىن قولداۋعا ايرىقشا باسىمدىق رەتىندە قارايتىنى بەلگىلى. «مادەني مۇرا» مەملەكەتتىك باعدارلاماسى اياسىندا اتقارىلعان شارۋالاردىڭ ءوزى ۇشان- تەڭىز. بيىل قازاق حاندىعىنىڭ 550 جىلدىعى اتالىپ وتەتىنى دە تاريح پەن مادەنيەتكە دەگەن مەملەكەتتىك كوزقاراستىڭ ەرەكشەلىگىن بىلدىرەدى.

قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ «قازاقستان-2050» ستراتەگياسى - قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا مىناداي جولدار بار: «ءداستۇر مەن مادەنيەت - ۇلتتىڭ گەنەتيكالىق كودى. پاتشالىقتىڭ، توڭكەرىس ءدۇمپۋى مەن توتاليتاريزمنىڭ بارلىق اۋىرتپالىعى مەن قيىنشىلىقتارىنا قاراماستان، ءبىزدىڭ ەلىمىزدىڭ اۋماعىندا تۇراتىن قازاقتار جانە باسقا دا حالىقتاردىڭ وكىلدەرى وزدەرىنىڭ مادەني ەرەكشەلىكتەرىن ساقتاي الدى. تاۋەلسىزدىك جىلدارىندا، جاھاندانۋ مەن ۆەستەرندەنۋگە قاراماستان، ءبىزدىڭ مادەني ىرگەتاسىمىز بەكي ءتۇستى. قازاقستان - بىرەگەي ەل. ءبىزدىڭ قوعامدا ءارتۇرلى مادەني ەلەمەنتتەر ءبىر- بىرىمەن بىرىككەن جانە ءبىرىن- ءبىرى تولىقتىرىپ تۇرادى، بىرىنە- ءبىرى ءنار بەرىپ تۇرادى».

«قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ كىتاپحاناسى» م م اتقارۋشى ديرەكتورى بەيسەمباي جۇمابەكوۆ شارانىڭ ماڭىزىنا بىلايشا توقتالدى: «ءبىزدىڭ مەكەمەمىز ەلباسى كىتاپحاناسى بولعاندىقتان، رۋحانياتتى قولداۋ ءىس- شارالارىنا ەرەكشە ءمان بەرەمىز. تەحنولوگيانىڭ قارىشتاپ دامىعان، جاپپاي جاھاندانۋ زامانىندا ۇلتتىق ناقىشتاعى شىعارماشىلىق وكىلدەرى نازاردان تىس قالماۋى ءتيىس. ويتكەنى ولار ءبىزدىڭ قانشاما عاسىرلىق ءتول وركەنيەتىمىز، مادەنيەتىمىز، دۇنيەتانىمىمىز بولعانىن وزگەلەرگە دە، وزىمىزگە دە مۇقيات تانىستىرادى. كەلەر ۇرپاق وسى ەڭبەكتەر نەگىزىندە ساباقتاستىعىمىزدى ساقتاي الادى. بۇل باعىتتا «قازاق حالقىنىڭ سالت- داستۇرلەرى» سىندى ەڭبەكتەردىڭ ماڭىزى زور» .

«ونەرى قازاقتىڭ تەرەڭدە جاتقان تاريحى مەن باي مادەني مۇراسىنان باستاۋ الاتىن سۋرەتشى ءارى جازۋشى ەرالى وسپان ۇلىنىڭ شىعارمالارىنىڭ باستى قاسيەتى - وتكەندى بۇگىنگى تىلمەن سويلەتە بىلۋىندە. وسى كىتاپ - سونىڭ تاعى ءبىر ايعاعى. اۆتوردىڭ بۇل شىعارماسىنىڭ ەلگە تيگىزەر پايداسى ءتىپتى ولشەۋسىز، اسىرەسە حالقىمىزدىڭ ءداستۇرلى مادەنيەتىنەن ءتۇرلى سەبەپتەرمەن اجىراپ قالعان قانداستارىمىز ءۇشىن تاپتىرماس دۇنيە»، دەدى اتالعان كىتاپ تۋرالى بەلگىلى ارحەولوگ، تاريح عىلىمدارىنىڭ دوكتورى زاينوللا ساماشيەۆ.

بۇل - تولىقتىرىلىپ ەكىنشى رەت باسىلىپ وتىرعان كىتاپ. وعان قازاقتاردىڭ ءداستۇرلى ادەت- عۇرىپتارىنا قاتىستى 90 سۋرەت ەنگىزىلدى. گرافيكالىق تۋىندىلاردىڭ ءارقايسىسىنا قىسقاشا سيپاتتاماسى قوسا بەرىلگەن. وندا كورسەتىلگەن سالت كوشپەلى حالىق ءۇشىن قانشالىقتى ماڭىزدى ەكەنى جازىلادى.

تۇساۋكەسەر شاراسىنا مەملەكەت قايراتكەرلەرى، ديپلوماتيالىق قىزمەت وكىلدەرى، رۋحانيات قايراتكەرلەرى، مەتسەناتتار مەن كاسىپكەرلەر قاتىستى. كوپشىلىكتى اۆتوردىڭ بۇعان دەيىن دە جوعارى باعالانىپ ۇلگەرگەن ۇلتتىق ناقىشتاعى شىعارمالارى ايرىقشا قىزىقتىردى.

«قازاق حالقىنىڭ سالت- داستۇرلەرى» كىتابىنىڭ جارىق كورۋىنە ORDA INVEST ينۆەستيتسيالىق- قۇرىلىس كورپوراتسياسى قارجىلاي قولداۋ كورسەتكەن.

كىتاپ اۆتورى ەرالى وسپان ۇلى شىمكەنتتەگى ونەر مەكتەبىن، كەيىن ءا. قاستەيەۆ اتىنداعى ونەر ۋچيليشەسىن بىتىرگەن. ماماندىعى - سۋرەتشى- بەزەندىرۋشى. كونە گراۆيۋرالار مەن فوتوسۋرەتتەر نەگىزىندە جاسالعان گرافيكالىق تۋىندىلاردىڭ اۆتورى. ونىڭ ەڭبەكتەرى قازاقستانمەن قاتار شەت ەلدەردە دە مويىندالعان. ە. وسپان ۇلىنىڭ گرافيكالارى «سوتبيس» ، «كريستيس» الەمدىك اۋكسيون ۇيلەرىندە بىرنەشە رەت قويىلعان.