قىزىلوردادا مۇنايدى قايتا وڭدەۋ زاۋىتىنىڭ جوباسى تانىستىرىلدى - فوتو

قىزىلوردا. قازاقپارات - قىزىلوردا وبلىسى اكىمدىگىندە جەر قويناۋىن پايدالانۋشىلارمەن وتكەن كەڭەستە مۇنايدى قايتا وڭدەۋ زاۋىتى قۇرىلىسىنىڭ جوباسى تانىستىرىلدى،

دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

   جيىندى اشقان وبلىس اكىمى ق. كوشەربايەۆ دۇنيەجۇزىلىك بانك ساراپشىلارىنىڭ بولجامدارى بويىنشا 2015 -جىلى الەمدەگى «قارا التىننىڭ» باعاسى قۇلدىراپ، ال كەلەسى جىلى شاعىن مولشەردە عانا ارتادى دەپ مالىمدەدى.

 ايماق ەكونوميكاسىنىڭ نەگىزگى تىرەگى سانالاتىن بۇل سالانىڭ تۇراقتى جۇمىس ىستەپ تۇرۋىنا مۇددەلىمىز. الايدا، جەر قويناۋىن پايدالانۋشى ءبىرقاتار كومپانيالار مۇنايدى وسى وڭىردەن ءوندىرىپ، سالىعىن باسقا ايماققا تولەيدى. ويتكەنى ولار وزگە وبلىستارعا تىركەلگەن.
  « قىزىلوردا وبلىسىندا وسى سالادا جۇمىس ىستەيتىن 3 مىڭنان استام ەنشىلەس كومپانيالاردىڭ تەك جارتىسى عانا وسى جەردە تىركەلگەن. ءبىز بۇعان جول بەرە المايمىز. سىر ەلىنىڭ نانىن جەپ وتىرعان مۇنايشىلار سالىقتى دا وسى جەرگە تولەۋى ءتيىس. جىلدىڭ سوڭىنا دەيىن بارلىق مۇناي كومپانيالارى قىزىلوردانىڭ سالىق دەپارتامەنتىنە تىركەلسىن»، - دەگەن تالاپ قويدى وبلىس اكىمى.

سونىمەن قاتار، مۇناي ءوندىرۋشى كومپانيالار الەۋمەتتىك جوبالاردى جۇزەگە اسىرۋعا بەلسەنە اتسالىسىپ كەلەدى. وسى ۋاقىتقا دەيىن ولاردىڭ قولداۋىمەن قىزىلوردادا مۇز ايدىنى، «شۇعىلا» دەمالىس ساياباعى، جاعالاۋداعى دەمالىس ايماعى، الەۋمەتتىك ساياباق، قامىستىباس كولىندە بالالاردى وقىتۋ- ساۋىقتىرۋ ورتالىعى سياقتى جوبالار جۇزەگە اسىرىلدى. سالىنىپ جاتقان يپپودروم مەن بالالار اۋىلىنا دا الەۋمەتتىك قولداۋ كورسەتپەك. ودان بولەك، كەلەسى جىلى 150 ورىندىق پەرزەنتحانا مەن ەمحانا سالۋ  جوسپارلانۋدا. ال رەسەيلىك «لۋكويل وۆەرسيز» كومپانياسى جىل سايىن اۋىل تۇرعىندارىنا «اقنيەت» باعدارلاماسىنىڭ اياسىندا قايتارىمسىز گرانت ءبولىپ كەلەدى.

قازاقستان ءۇشىن وزەكتى ماسەلەلەردىڭ ءبىرى - ديزەل وتىنى مەن اۆياكەروسين تاپشىلىعى. وسىعان وراي «قىزىلوردا مۇناي قايتا وڭدەۋ زاۋىتى» ج ش س ديرەكتورى باۋىرجان ىسقاقوۆ از توننالىق مۇنايدان موتورلى وتىن جانە بەنزين شىعاراتىن زاۋىت قۇرىلىسىنىڭ جوباسىن تانىستىرىپ، ونى جوسالى كەنتىندەگى مۇناي قۇياتىن تەرمينال جانىنان سالۋدى ۇسىندى. زاۋىتتا قىزىلوردا جانە باتىس قازاقستان وبلىستارىنىڭ مۇنايى قايتا وڭدەلگەن جاعدايدا ءونىم قۇنىن ەسەلەپ ارتتىرۋعا جانە قازاقستاندى جەرگىلىكتى جانار- جاعارمايمەن قامتاماسىز ەتۋگە سەپتىگىن تيگىزەدى.

وبلىس اكىمى مۇناي ءوندىرۋشى كومپانيالاردىڭ باسشىلارىنا  جوبانى تالقىلاپ، ونى بىرلەسىپ جۇزەگە اسىرۋ مۇمكىندىگىن قاراستىرۋدى ۇسىندى. سونداي- اق، ايماق باسشىسى كەن ورىندارىن يگەرۋدى تەزدەتىپ، وندىرىستە يننوۆاتسيالىق ادىستەردى قولدانۋ ارقىلى مۇناي ءوندىرۋ جوسپارىن ءجۇز پايىزعا ورىنداۋدى تاپسىردى. ودان بولەك، وبلىس اكىمى جەرگىلىكتى مەردىگەرلەردى مۇمكىندىگىنشە جۇمىسقا تارتۋدى جانە ۇكىمەت تاپسىرىسى بويىنشا ونەركاسىپ بيۋدجەتىن 10 پايىزدان  استام مولشەردە ازايتپاۋدى تالاپ ەتتى.