قازاقستان مەن قىتاي باعالى قاعازدار نارىعىنداعى قاداعالاۋ قىزمەتى سالاسىنداعى ىنتىماقتاستىق تۋرالى قۇجاتقا قول قويدى

بەيجىڭ. قازاقپارات - ق ر ۇلتتىق بانكىنىڭ ءتوراعاسى قايرات كەلىمبەتوۆتىڭ قىتاي ەلىنىڭ استاناسىنا بارعان جۇمىس ساپارى بارىسىندا ق ر ۇلتتىق بانكى مەن ق ح ر باعالى قاعازداردى رەتتەۋ جونىندەگى كوميسسياسى قاداعالاۋ سالاسىنداعى ىنتىماقتاستىق پەن ءوزارا تۇسىنىستىك تۋرالى مەموراندۋمعا قول قويىلدى.

بۇل جايلى وتاندىق جۋرناليستەرگە بەرگەن سۇحباتىندا ق ر ۇلتتىق بانكى ءتوراعاسىنىڭ كەڭەسشىسى اقىلجان بايماعامبەتوۆ ءمالىم ەتتى.

«مەموراندۋمنىڭ ماقساتى - باعالى قاعازدار نارىعىن قاداعالاۋ سالاسىنداعى ىنتىماقتاستىققا قۇقىقتىق نەگىز قۇرۋ. بۇل ءوزارا قۇندى قاعازدار نارىعىن اشىپ، قاداعالاۋ اقپاراتتارىمەن الماسۋ ءۇشىن جاسالىپ جاتىر»، - دەدى ول.

ا. بايماعامبەتوۆ سوڭعى جىلدارى قىتايمەن قارجى سالاسىنداعى ىنتىماقتاستىق قارقىندى تۇردە دامىپ كەلە جاتقاندىعىن ايتتى. «وتكەن جىلى ءبىزدىڭ قور بيرجاسىندا يۋان مەن تەڭگە بيرجالىق ساۋداسى ىسكە قوسىلدى. ال 2014-جىلدىڭ قىركۇيەگىندە ءۇرىمجى قالاسىنداعى ايماقتىق نارىقتا تەڭگە-يۋان ساۋداسىنىڭ ىسكە قوسىلۋى بۇعان جاۋاپ قادام بولدى، - دەپ اتاپ ءوتتى ول.

ق ر ۇلتتىق بانكىنىڭ وكىلى 2014-جىلدىڭ جەلتوقسانىندا ق ح ر مەملەكەتتىك كەڭەسىنىڭ پرەمەرى لي كىشياڭنىڭ استاناعا بارعان جۇمىس ساپارى كەزىندە 200 ميلليارد تەڭگە جانە 7 ميلليارد يۋان سوماسىنا ۆاليۋتالىق ايىرباس تۋرالى كەلىسىمگە قول قويىلعاندىعىن ەسكە سالدى.

ق ر ۇلتتىق بانكىنىڭ ءتوراعاسى قايرات كەلىمبەتوۆ بەيجىڭدەگى وسى جۇمىس ساپارى كەزىندە ينفراقۇرىلىمدىق ينۆەستيتسيالاردىڭ ازيالىق بانكى كوپجاقتى ۋاقىتشا حاتشىلىعىنىڭ باس حاتشىسى جين ليتسيۋنمەن، قىتاي ينۆەستيتسيالىق كورپوراتسياسىنىڭ باسقارما ءتوراعاسى دين سيۋەدۋنمەن جانە قىتايدىڭ وزگە قارجى ينستيتۋتتارىنىڭ باسشىلارىمەن كەلىسسوزدەر جۇرگىزدى.