قىتاي ەكونوميكامىزعا ينۆەستيتسيا سالىپ، ەكىجاقتى كاسىپورىندار اشۋعا مۇددەلى - ن. التايەۆ
بۇل تۋرالى بۇگىن استانادا وتكەن «ءبىر بەلدەۋ - ءبىر جول» اتتى قازاقستان رەسپۋبليكاسى مەن قىتاي حالىق رەسپۋبليكاسى بيزنەس- فورۋمىندا «اتامەكەن» ۇلتتىق كاسىپكەرلەر پالاتاسى ءتوراعاسىنىڭ ورىنباسارى نۇرجان التايەۆ ايتتى.
«وزدەرىڭىز بىلەسىزدەر، قازىرگى كەزدە باتىس ەلدەرىنىڭ ەكونوميكاسى ايتارلىقتاي قيىنشىلىقتار كورىپ وتىر. وسىعان بايلانىستى ەۋروپادان كولەمدى ينۆەستيتسيالار كۇتۋ ورىنسىز دەپ ايتۋعا بولادى. سوندىقتان، قازىرگى كەزدە باسقا ەلدەرگە بەلسەندى تۇردە ينۆەستيتسيالار سالىپ وتىرعان قىتاي مەملەكەتىنىڭ نازارىن قازاقستانعا اۋدارۋ ءبىز ءۇشىن وتە ءتيىمدى. جىلدان جىلعا ەكى ەل اراسىنداعى ەكونوميكالىق قارىم-قاتىناس دامىپ كەلە جاتىر. سوندىقتان، ءبىز ق ح ر- دى سەنىمدى سەرىكتەس رەتىندە قابىلدايمىز»، - دەدى ن. التايەۆ.
ونىڭ ايتۋىنشا، بۇگىنگى دەلەگاتسيا قىتاي حالىق رەسپۋبليكاسى گۋاڭدۋن پروۆينتسياسى ۇكىمەتىنىڭ باسشىلىعى مەن بيزنەسمەندەرىنەن قۇرالعان.
«وزدەرىڭىز بىلەسىزدەر، گۋاڭدۋن قىتايداعى ەڭ دامىعان وڭىرلەردىڭ ءبىرى. وندا ءوندىرىس پەن زاماناۋي تەحنولوگيالار وتە جوعارى دەڭگەيدە دامىعان. بۇگىنگى كەلىپ وتىرعان دەلەگاتسيا قازاقستاننىڭ ينۆەستيتسيالىق الەۋەتىمەن جاقىن تانىسۋدى ماقسات ەتەدى. ولار ءبىزدىڭ ەكونوميكامىزعا ءتيىمدى ينۆەستيتسيا جاساپ، ەكىجاقتى كاسىپورىندار اشۋعا مۇددەلى»، - دەيدى ن. التايەۆ.
ونىڭ اتاپ وتۋىنشە، جۋىردا قىتاي مەملەكەتىنىڭ باسشىسى قازاقستانعا جاساعان ساپارىندا ۇلى جىبەك جولىن قايتا جانداندىرۋ تۋرالى باستاما كوتەرگەن بولاتىن.
«ولار ءۇشىن قازاقستان رەسەي نارىعىنا شىعاتىن جول رەتىندە ماڭىزدى دەپ ايتۋعا بولادى. جانە ءبىز رەسەيمەن ءبىرىڭعاي ەكونوميكالىق وداققا ەنەتىندىكتەن، ولار ءبىزدىڭ تەرريتوريامىزدا ءوزىنىڭ وندىرىستەرىن ورناتىپ، سولاردان شىققان ءونىمدى اتالعان وداققا كىرەتىن ەلدەرگە شىعارۋدى جوسپارلاۋدا»، - دەپ ءتۇسىندىردى ۇلتتىق پالاتا ءتوراعاسىنىڭ ورىنباسارى.
اۆتور: ءابۋ-اسقار مەكەش ۇلى
