قازاقستاننىڭ قىتايمەن ساۋدا ستاتيستيكاسىنداعى الشاقتىق پروبلەماسى ءالى شەشىمىن تاپقان جوق - قارجى

استانا. قازاقپارات - قازاقستاننىڭ قىتايمەن ساۋدا ستاتيستيكاسىنداعى الشاقتىق پروبلەماسى ءالى دە ادىستەمەلىك جاعىنان شەشىم تاپقان جوق.

بۇگىن پارلامەنت ماجىلىسىندە قازاقستان رەسپۋبليكاسى ۇكىمەتىنىڭ 2014-جىلعا رەسپۋبليكالىق بيۋدجەتتىڭ اتقارىلۋى تۋرالى ەسەبىن تانىستىرعان قارجى ءمينيسترى باقىت سۇلتانوۆ وسىلاي مالىمدەدى.

«قازاقستان مەن قىتايدىڭ ساۋدا ستاتيستيكاسىنداعى 5 ميلليارد دوللارعا جۋىق الشاقتىق ءبىرقاتار جىلدار بويى كەلە جاتىر. الشاقتىق سەبەبى دەكلاراتسيالاۋدىڭ انىقتىعىنا عانا قاتىستى ەمەس. باستى سەبەپ - ءبىزدىڭ ەلىمىز ارقىلى باسقا ەلدەرگە كەتەتىن قىتايلىق ەكسپورت. ماسەلەن، قىتايدا ءبىرىنشى قۇرلىقتىق شەكارا ەكسپورت بولىپ سانالادى. ال قازاقستان ءۇشىن بۇل ارينە يمپورت ەمەس، ترانزيت»، - دەدى ب. سۇلتانوۆ.

بۇل رەتتە قارجى ءمينيسترى پروبلەمانى شەشۋ قاجەتتىلىگىن دە اتاپ ءوتتى. ونىڭ ايتۋىنشا ادىستەمەلىك تۇسىندىرۋلەر بولعاندىقتان، ونى ادىستەمەلىك تۇرعىدان دا شەشۋگە بولادى.

«دەگەنمەن، بۇل - ەكىجاقتى، ءتىپتى ءۇشجاقتى ماسەلە ەمەس. ويتكەنى، بۇنداي الشاقتىق قىتاي مەن ءبىزدىڭ ارامىزدا عانا ەمەس، كەدەن وداعى مۇشەلەرىنىڭ اراسىندا دا بار. ماسەلەن، قىتاي مەن رەسەي اراسىنداعى ايىرماشىلىق 6,9 ميلليارد دوللاردى، ال قىرعىزستانمەن 4,1 ميلليارد دوللاردى قۇراپ وتىر»، - دەدى مينيستر.

ايتا كەتەرلىگى، ءمينيستردىڭ سوزىنە قاراعاندا، قىتايدان يمپورتتالاتىن تاۋارلار بويىنشا بيۋدجەتكە تۇسەتىن كەدەندىك باجدار سوڭعى بەس جىلدا وڭ ۇردىسكە يە بولا باستاعان.

اۆتور: قانات مامەتقازى ۇلى