جاپوندار اۋامەن جۇرەتىن اۆتوموبيل جاساپ شىعاردى
اۆتوموبيلدىڭ جۇمىس ىستەۋ قاعيداسى مىناداي: جانارماي ۇياشىعىنداعى سۋتەگى اۋاداعى وتتەگىمەن ارالاسىپ، حيميالىق رەاكسيانىڭ ناتيجەسىندە ماشينانىڭ ەلەكتروموتورىنا قولدانىلاتىن ەلەكتر پايدا بولادى. رەاكسيا سوڭىندا سۋ بولىنەدى. ال جارىلىس قاۋپىن ازايتۋ ماقساتىندا حيميالىق رەاكسيالار جۇرەتىن جانارماي ۇياشىعىنا كاپسۋلا ورناتىلادى.
نارىقتاعى ەلەكترو اۆتوموبيلدەرگە قاراعاندا، Toyota Mirai بەنزينمەن جۇرەتىن ماشينالارعا ۇقسايدى. ونىڭ جىلدامدىعى ساعاتىنا 178 شاقىرىم، ورنىنان بىردەن قوزعالۋ شاپشاڭدىعى 9,6 سەكۋندتا 100 شاقىرىم اينالىمعا دەيىن جەتە الادى. ەڭ باستىسى، مۇنداي اۆتو ءبىر رەت «جانارماي» قۇيعاننان كەيىن 480 شاقىرىمعا دەيىن جۇرە الادى. باكقا سۋتەگىنى 10 مينۋت ىشىندە تولتىرۋعا بولادى.
ءبىر جاعىنان، مۇنداي اۆتوموبيلدەر ەكونوميكالىق جانە ەكولوگيالىق پروبلەمالاردى شەشۋگە كومەكتەسەدى. دەگەنمەن، بىرنەشە كەدەرگى دە بار كورىنەدى. مىسالى، ءتورت ەسىكتى Toyota Mirai شامامەن 100 مىڭ دوللار تۇرادى، ياعني قىمبات، جانارماي بەكەتتەرى وتە از ( ۇلى بريتانيادا 12 بەكەت بار) جانە سۋتەگى بولىنگەن كەزدە تابيعاتقا زيان كەلەدى.
كومپانيا وكىلدەرىنىڭ ايتۋىنشا، سۋتەگىمەن جۇرەتىن اۆتوموبيل ءار ميل سايىن 100 ميلليليتر سۋ ءبولىپ وتىرادى. بۇل سۋىق كليماتتى ەلدەر ءۇشىن قولايسىز بولۋى مۇمكىن. اۋا تەمپەراتۋراسى تومەن بولعان كەزدە جول ۇستىندە سۋ قاتىپ، كوكتايعاققا اينالۋى مۇمكىن. ال ول سۋدى بۋ رەتىندە ءبولىپ وتىرسا، وندا اۋادا تۇماننىڭ پايدا بولۋ قاۋپى بار.
