ماسكەۋ حالىقارالىق كينو فەستيۆالىندە شىعىس قازاقستان وبلىسى سۋديالارىنىڭ جۇمىسى جوعارى باعالاندى

استانا. قازاقپارات - شىعىس قازاقستان وبلىستىق سوتىندا «ك ت ك» تەلەارناسىنىڭ «چەرنىي كۆادرات» باعدارلاماسىنىڭ اۆتورى ۆالەري تاراكانوۆ وبلىستىق سوتتىڭ سۋديالارىنا، قىلمىستىق ىستەر جونىندەگى مامانداندىرىلعان اۋدانارلىق سوتىنىڭ سۋدياسى ر. يگيشيەۆاعا «دەتەكتيۆ فەست» قۇقىق قورعاۋ تاقىرىبىنداعى دەتەكتيۆتى فيلمدەر مەن تەلەباعدارلامالاردىڭ حالىقارالىق كينوفەستيۆالىنە ۇلەس قوسقاندارى ءۇشىن ديپلومدار تاپسىردى.

بۇل فەستيۆال ماسكەۋ قالاسىندا جىل سايىن وتكىزىلەدى. فەستيۆالگە 34 ەلدىڭ وكىلدەرى قاتىستى. كينوفەستيۆالگە قاتىسۋعا 60 كوركەم فيلم، 30 دەتەكتيۆتى سەريال، 150 تەلەباعدارلاما، 90 قىسقامەتراجدى جانە دەرەكتى تاسپالار ۇسىنىلعان.

قازاقستان اتىنان «ك ت ك» تەلەارناسىنىڭ رەداكسياسى «چەرنىي كۆادرات» قۇقىقتىق باعدارلاماسى جوباسىن ۇسىندى. شىعىس قازاقستان وبلىسى سۋديالارىنىڭ قاتىسۋىمەن ۇسىنىلعان كورسەتىلىمدەر بايقاۋدىڭ بارلىق تالاپتارى بويىنشا ۇزدىك بولىپ تانىلدى.

«چەرنىي كۆادرات» باعدارلاماسى جانرلىق نوميناتسياسىنىڭ جەڭىمپازى اتانسا، ش ق و مامانداندىرىلعان قىلمىستىق ىستەر جونىندەگى سوتى سۋديالارى قاتىسقان باعدارلاما «مير بەز ناركوتيكوۆ!» اتالىمىندا جۇلدەگە يە بولدى.

باعدارلاما اۆتورى جوعارعى سوتتىڭ قىلمىستىق ىستەر جونىندەگى قاداعالاۋ القاسىنىڭ ءتوراعاسى ا. راحمەتۋلينگە (شىعىس قازاقستان وبلىستىق سوتىنىڭ بۇرىنعى ءتوراعاسى) ءتۇسىرىلىمنىڭ ۇيىمداستىرىلۋىنا كومەك كورسەتكەنى ءۇشىن العىسىن ءبىلدىردى.

اۆتور: ن. نۋراحمەت