سەمەيدە «قۇنانباي» كوركەم فيلمىنىڭ پرەمەراسى ءوتتى
كارتينانى العاشقى بولىپ 12- مامىردا ونىڭ قاراۋىل اۋىلىنداعى جەرلەستەرى كوردى، 13- مامىردا سەمەي قالاسىنىڭ «ەڭلىك-كەبەك» جانە «الەم» كينوتەاترلارىندا بولدى. بۇل تۋرالى سەمەي قالاسى ىشكى ساياسات ءبولىمىنىڭ اقپاراتتىق سەكتورى حابارلادى.
فيلمدى بەلگىلى قازاقستاندىق كينو رەجيسسەر، سەناريست، تەاتر جانە كينو اكتەرى، پروديۋسەر، قازاقستاننىڭ حالىق ءارتىسى، ق ر مەملەكەتتىك سىيلىعىنىڭ لاۋرەاتى دوسحان جولجاقسىنوۆ قويدى.
فيلم سەناريىن جازۋعا جازۋشى تالاسبەك اسەمقۇلوۆ قاتىسقان بولاتىن.
فيلمنىڭ مۋزىكاسىن جازعان تولەگەن مۇحامەدجانوۆ. فيلمگە بەلگىلى قازاقستاندىق ارتىستەرمەن بىرگە سەمەيدەگى اباي اتىنداعى جانە ف. م. دوستويەۆسكي اتىنداعى تەاترلاردىڭ اكتەرلەرى قاتىستى.
جاڭا كينوتۋىندى ۇلى ابايدىڭ اكەسى قۇنانباي قاجىنىڭ ءومىر جولى، وسكەن ورتاسى تۋرالى باياندايدى. دوسحان جولجاقسىنوۆتىڭ جاڭا تۋىندىسىنىڭ باس كەيىپكەرى قۇنانباي وسكەنباي ۇلى 1804-جىلى سەمەي ماڭىنداعى شىڭعىستاۋدا دۇنيەگە كەلگەن، قازاق دالاسىنداعى جارقىن دا قاراما-قايشىلىعى مول تۇلعا بولعان. ءبي، بولىس، سۇلتان بولعان قۇنانباي قازاق دالاسىنىڭ داستۇرلەرىن، پاتشا وكىمەتىنىڭ «ءسىبىر قازاقتارىنىڭ جارعىسىن»، شاريعات زاڭدارىن قاتاڭ ساقتاعان ادام. قۇنانباي سونىمەن قاتار ەل اراسىنداعى بارىمتا، ۇرلىق دەگەن كەلەڭسىزدىكتەرگە قاتاڭ تىيىم سالعان. قازاق دالاسىندا بولعان پولياك ساياحاتشىسى ادولف يانۋشكيەۆيچ قۇنانبايمەن كەزدەسكەن ادامداردىڭ ءبىرى، ول ءوز جازبالارى مەن كۇندەلىكتەرىندە قۇنانبايدىڭ شەشەندىگىنە، اقىل-پاراساتىنا جوعارى باعا بەرگەن.
«ءبىرجان سال» فيلمىن تۇسىرگەننەن كەيىن ءبىز تالاسبەك اسەمقۇلوۆ ەكەۋمىز جاڭا جۇمىستارىمىزعا تاقىرىپ ىزدەدىك. ءبىزدىڭ تاريحىمىزدا كوشەلى تۇلعالار از ەمەس، سونىڭ ىشىندە قۇنانبايعا توقتالدىق. كوپشىلىك ونى ءبي، بولىس، سۇلتان رەتىندە بىلەدى. ال ءبىز ونىڭ ادامگەرشىل جاقتارىنا باسا كوڭىل بولدىك. وعان ازىرلىككە بەس جىل ۋاقىت كەتتى. بىزگە سول كەزدەگى ش ق و اكىمى بەردىبەك ساپاربايەۆ قارجىلاي قولداۋ جاسادى، قاراۋىل اۋىلىنىڭ جانە سەمەي قالاسىنىڭ تۇرعىندارى كوپ كومەك كورسەتتى»، - دەدى باستى ءرولدى سومداعان دوسحان جولجاقسىنوۆ فيلمنىڭ پرەمەراسىندا.
«قۇنانباي» تاريحي فيلمى جالپى ۇلتتىق پروكاتقا 25- مامىردا شىعادى.
