مەملەكەت باسشىلارىنىڭ جۇبايلارى - فوتو

استانا. قازاقپارات - ەل اراسىنداعى «اسىل جار - ەردىڭ ساۋلەتى»، «جاقسى جۇباي - جارىم باقىت»، «جاقسى ايەل جامان ەرىن حان قىلادى، جامان ايەل جاقسى ەرىن داڭ قىلادى» دەگەن ناقىل سوزدەر ەر كىسىلەردىڭ مانسابىنداعى ايەلدىڭ ءرولىن ايقىنداي تۇسەدى.

تاريح ساحناسىندا ەل باسقارۋدا ەرلەرىنە ءوز سەپتىگىن تيگىزگەن حيلاري كلينتون، جاكلين كەننەدي، رايسا گورباچيەۆا سىندى پرەزيدەنتتەردىڭ ايەلدەرى ەل اۋزىنا ىلىككەن بولاتىن.

نازارلارىڭىزعا lady.mail.ru سايتى تىزبەكتەگەن ەڭ بەدەلدى ءبىرىنشى حانىمداردىڭ ەسىمدەرىن ۇسىنامىز.

ا ق ش: ميشەل وباما

ا ق ش- تىڭ 44- پرەزيدەنتى باراك وبامانىڭ ايەلى ميشەل، Forbes جۋرنالىنىڭ رەيتىنگىسىنە سەنسەك، الەمنىڭ ەڭ تانىمال حانىمى. ميشەل وباما پرەزيدەنتتىڭ سايلاۋ ناۋقانىنا بارىنشا اتسالىسىپ جۇرەدى. ميشەل قاشاندا ءساندى كيىنىپ، پايدالى تاعامداردى جانە سپورتتى ناسيحاتتايدى. ول اق ۇيدە باقشا ءوسىرىپ، سپورتقا اۋەستىگىن جاسىرمايدى. ميشەلدىڭ شوۋدا ءوزىن ەركىن ۇستاۋى جانە بيلەپ بەرگەنى تالايدىڭ تاڭدايىن قاقتىرعان بولاتىن.

فرانسيا: ۆالەري تريەرۆەيلەر

فرانسيا پرەزيدەنتى فرانسۋا وللاندتىڭ ازاماتتىق ايەلى ۆالەري تريەرۆەيلەرگە مودەل ءارى ءانشى كارلا برۋني-ساركوزيدى باسىپ وزۋ وڭايعا سوقپادى. ۆالەري - بەدەلدى جۋرناليست ءارى ءۇش بالانىڭ اناسى.

پرەزيدەنتپەن قارىم-قاتىناسىن ۇزاق جاسىرىپ كەلگەن ۆالەري تريەرۆەيلەر نەكەسىن زاڭداستىرۋعا اسىقپايدى. ۆالەري پرەزيدەنتتىڭ سايلاۋ الدى كامپانياسىن ۇيىمداستىرۋعا بارىنشا ءوز ۇلەسىن قوسىپ، قازىردە وللاندتىڭ باستى كەڭەسشىسىنە اينالدى دەسەك تە بولادى.

ءازىربايجان: مەحريبان اليەۆا

مەحريبان اليەۆا ءازىربايجاننىڭ بولاشاق پرەزيدەنتى يلحام اليەۆكە ءوزى مەديتسينا ۋنيۆەرسيتەتىنىڭ ستۋدەنتى بولعان كەزدە تۇرمىسقا شىققان. اليەۆ جارىنىڭ قولداۋىمەن مانسابىندا ايتارلىقتاي جەتىستىكتەرگە جەتتى.

مەحريبان ءوز سۇحباتىندا كۇيەۋىمەن 20 جىلدا بار جاقسى-جامان كەزەڭدەردى بىرگە وتكەرگەنىن ايتتى. حانىم بۇگىندە ءۇش بالانىڭ اناسى اتانىپ وتىر.

كاتار: موزا بينت ناسەر ال-ميسنەد

كاتار ليدەرى، شەيح حاماد بەن كاليفا-ال-ءتانيدىڭ ءۇش ايەلى بار. الايدا ونىڭ بىرەۋى عانا كۇيەۋىمەن كوپشىلىك الدىنا شىعۋ مارتەبەسىنە يە بولعان. شەيح ايەلى موزا بينت ناسەر ال-ميسنەدتى ساياسي ورتادا كورسەتۋگە لايىق ارۋ سانايدى.

كاتار حانىمى جابىق كيىنىپ، ۇلتتىق كيىمدەرگە ورانىپ جۇرسە دە سۇلۋلىعىمەن تالايدىڭ تاڭدايىن قاقتىرعان. ول تەك كوركىمەن عانا ەمەس، اقىلىمەن دە كوزگە تۇسكەن. موزا كاتار ۋنيۆەرسيتەتىن ءتامامداپ، ا ق ش- تا ءىس-تاجىريبەدەن وتكەن. جۋرناليستەر ونى ارابتىق گرەيس كەللي دەپ اتاپ ءجۇر.

ۇلى بريتانيا: سامانتا كەمەرون

پرەمەر-مينيستر دەۆيد كەمەروننىڭ جۇبايى سامانتا كۇيەۋىن قاشاندا قولداپ جۇرەدى. دەموكراتيانى جاقتايتىن پرەمەر قاراپايىم ءومىر ءسۇرىپ، مەترومەن نەمەسە ۆەلوسيپەدپەن جۇمىسقا بارعاندى ۇناتادى.

ايەلى بيزنەس الەمىندە ءوز ورنىن سايلاپ ۇلگەرگەنىمەن، پرەمەر سياقتى قاراپايىم جان. ول Zara سياقتى جاي برەندتەردى تاڭداسا دا، Vogue جۋرنالى سامانتانى ەڭ ءساندى حانىم دەپ اتاپ ۇلگەردى.

سيريا: اسما اساد

سيريالىق باسشى باشار اسادتىڭ جارى اسما اساد كوپشىلىك الدىندا كورىنە بەرۋدى ۇناتپايدى. حانىم لوندوندا ءبىلىم الىپ، ا ق ش- تىڭ ءىرى قارجى كومپانياسىندا قىزمەت ەتكەن. كەيىن سيرياعا كەلىپ، باشارعا تۇرمىسقا شىعادى.

اسما - سيريانىڭ «ليبەرالدى تۇلعاسى». ول اراب كيىمىن كيمەي، ادامدار ءوز تاڭداۋىن جاساۋعا قۇقىلى ەكەنىن دالەلدەۋگە تىرىسۋدا. بۇگىندە اسما - ءۇش بالانىڭ اناسى. ساياساتقا كەي-كەزدەرى ارالاسىپ تۇرادى. جاقىندا سيرياداعى سوعىس جاعدايىن ەسكەرە وتىرىپ، اسما كۇيەۋىن قولدايتىن ناسيحات روليگىنە ءتۇستى.

قىتاي: پەن ليۋان

شي جينپيننىڭ ايەلى پەن ليۋان بۇعان دەيىن ۇلى دەرجاۆانى باسقارعان ليدەرلەردىڭ ايەلدەرىمەن سالىستىرعاندا، قوعامدا بەلسەندىلىك تانىتىپ، تانىمال بولۋىمەن ەرەكشەلەندى.

ول شوۋ-بيزنەستە ءوز ورنىن تاۋىپ ۇلگەرگەن. قىتايدا ەشبىر جاڭا جىلدىق كونسەرت حانىمنىڭ قاتسىۋىنسىز وتپەيدى. 50 جاسار پەن ءجيى تەگىن قايىرىمدىلىق كونسەرتتەر ۇيىمداستىرادى.

ەستونيا: ەۆەلين يلۆەس

ەستونيا حانىمى ەۆەلين پرەزيدەنتپەن س ءى م ءمينيسترى بولعان كەزدە تانىسقان. ەكەۋىنىڭ قارىم-قاتىناسى جاريا ەتىلىپ، ەۆەلين ب ا ق- تا «يلۆەستىڭ كوڭىلدەسى» دەگەن باعالاۋعا يە بولعاسىن، توماس يلۆەس ەۆەلينگە ۇيلەنەدى.

ەۆەلين سالماعىنىڭ كوپ بولۋىمەن جانە ستيلىنىڭ بولماۋىمەن دە سىنعا ۇشىراعان بولاتىن. الايدا ول ءوزىن قولعا الىپ، سالماق تاستاپ، ءبىرتالاي وزگەرىستەر جاسادى.

گرۋزيا: ساندرا رۋلوفس

گرۋزيا پرەزيدەنتى ميحايل سااكاشۆيليدىڭ جۇبايى ساندرۋ رۋلوفس كەزىندە ادام قۇقىقتارى ءپانىنىڭ وقىتۋشىسى بولعان. ول كەزدە سااكاشۆيلي ساياساتقا بەت بۇرماعان بولاتىن. ساندرا قاراپايىم جىگىت ءۇشىن ەۋروپانى تاستاپ، ميحايلمەن تبيليسگە كوشەدى.

رۋلوفس كۇيەۋى ءۇشىن گرۋزين ءتىلىن مەڭگەرىپ شىقتى. قازىردە حانىم 5 ءتىلدى، ونىڭ ىشىندە ورىس ءتىلىن ەركىن مەڭگەرگەن. فورتەپيانو مەن فلەيتادا ويناي بىلەدى. مەديتسينادان دا حابارى بار جان-جاقتى تۇلعا.

جاپونيا: اكيە ابە

جاپونيا پرەمەر-ءمينيسترى سينزو ءابەنىڭ جۇبايى اكيە ابە ايەلدەردىڭ دە داۋىسى ەسەپكە الىنۋى كەرەكتىگىن دالەلدەي الدى.

اكيە ءىس-شارالار مەن سامميتتەرگە ءجيى قاتىسادى. بىرنەشە جىلدار بويى راديو ديدجەيى بولىپ قىزمەت اتقارعان. فلامەنكو بيىمەن اۋەستەنەدى.

Nur.kz