قازاقستاندىق ونەر جۇلدىزدارى ناۋقاس بالالارعا كومەك رەتىندە قان تاپسىردى - فوتو
ايتا كەتەيىك، اكسيا ماۋسىمنىڭ 14 ىنە دەيىن جالعاسادى. كەز-كەلگەن ادام قان ورتالىعىنا كەلىپ، ونكولوگيالىق اۋرۋمەن اۋىراتىن ناۋقاس بالالاردىڭ ءومىرىن قۇتقارىپ قالۋعا ءوز ۇلەسىن قوسا الادى.
بيىلعى اكسياعا شوۋمەن نۇرتاس ادامبايەۆ، تۇرسىنبەك قاباتوۆ، سپورتشى يليا يلين، ديانا سنەگينا، بۇركىت پەن ايشا، ءالي وقاپوۆ، ساياساتتانۋشى دوسىم ساتپايەۆ قاتىستى.
«قازىرگى تاڭدا قازاقستاندا دونورلاردىڭ سانى 1000 ادامعا شاققاندا 18 ادام. د د ۇ نورمالارىنا سايكەس، اۋرۋحانالاردى تولىعىمەن قامتاماسىز ەتۋ ءۇشىن 1000 ادامعا شاققاندا 50 ادام دونور بولۋى كەرەك. دونور قانىنا لەيكەميامەن اۋىراتىن بالالار، بوساناتىن ايەلدەر، جاڭا تۋعان سابيلەر، اپاتتان جاپا شەككەن بولماسا شۇعىل وپەراتسيا قاجەت ەتەتىن ناۋقاستار مۇقتاج»، - دەدى رەسپۋبليكالىق قان ورتالىعىنىڭ ديرەكتورى گۇلسارا بەكمۇحايەۆا.
ۇيىمداستىرۋشىلاردىڭ اتالعان اكسيانى «Hot Blооd challenge» دەپ اتاۋى دا تەگىن ەمەس. 2014-جىلى Ice Bucket Challenge اكسياسى بۇكىل الەمدى شارلاپ كەتكەن بولاتىن.
قان تاپسىرۋشىلار دا ەندى وزدەرىنىڭ اتىنان ەستافەتا تاپسىرا الادى. ماسەلەن، ساياساتتانۋشى دوسىم ساتپايەۆ اكسيانى كينو رەجيسسەر ەرمەك تۇرسىنوۆ، ساياساتتانۋشى ەرلان قارين پەدياتريا جانە بالالار حيرۋرگياسى عىلىمي ورتالىعى ديرەكتورىنىڭ ورىنباسارى ايگۇل بازاربايەۆاعا تابىستادى.
14- ماۋسىمدا «اتاكەنت» كورمە كەشەنىندە قازاقستان ەستراداسى جۇلدىزدارىنىڭ قاتىسۋىمەن قورىتىندى كونسەرت وتەدى. وعان قان تاپسىرعاندار تەگىن كىرەدى. بيلەتتەردىڭ ىشىندە تۇركياعا جولداما ويناتىلادى.
2014-جىلى وسىنداي اكسيا ارقىلى 1800 ليتر قان جينالعان ەدى. بيىل ۇيىمداستىرۋشىلار الماتىدا - 1000 ليتر، رەسپۋبليكا بويىنشا 3000 ليتر قان جيناۋدى جوسپارلاپ وتىر.
اۆتور: گۇلميرا عوسمانالي
