استانادا «ەلباسى جانە قازاق مەملەكەتتىگى» كىتابىنىڭ تانىستىرىلىمى ءوتتى

استانا. قازاقپارات - بۇگىن استاناداعى ق ر ۇلتتىق اكادەميالىق كىتاپحاناسىندا ق ر پارلامەنتى ءماجىلىسىنىڭ دەپۋتاتى، قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيانىڭ ءتوراعاسى قۋانىش سۇلتانوۆتىڭ «ەلباسى جانە قازاق مەملەكەتتىگى» كىتابىنىڭ تانىستىرىلىمى بولدى.

اۆتوردىڭ بۇل كىتابىندا مەملەكەت باسشىسى نۇرسۇلتان نازاربايەۆتىڭ تاۋەلسىز قازاقستاننىڭ قالىپتاسۋى، قارقىندى دامۋى جانە حالىقارالىق بەدەلىنىڭ نىعايۋى جولىنداعى سان قىرلى قىزمەتى بەينەلەنگەن.

قازاقستان حالقى اسسامبلەياسى عىلىمي-ساراپتامالىق كەڭەسى تانىستىرىلىم اياسىندا بەلگىلى قوعام قايراتكەرى، ساياسي عىلىمداردىڭ دوكتورى، پروفەسسور ق. س. سۇلتانوۆتىڭ وسىناۋ بىرەگەي كىتابىنىڭ جاريا رەتسەنزياسىن ۇيىمداستىرىپ وتىر. باسىلىم ساندىق نۇسقادا عالامتور جەلىسىنە ۇسىنىلادى.

ايتا كەتەيىك، بۇگىنگى تانىستىرىلىمدى قازاقستان حالقى اسسامبلەياسى، ق ر پرەزيدەنتىنىڭ جانىنداعى «قوعامدىق كەلىسىم» ر م م، ق ح ا عىلىمي-ساراپتامالىق كەڭەسى ۇيىمداستىردى.

تانىستىرىلىمعا قازاقستان حالقى اسسامبلەياسى ءتوراعاسىنىڭ ورىنباسارى، حاتشىلىق مەڭگەرۋشىسى ەرالى توعجانوۆ، ق ح ا كەڭەسىنىڭ مۇشەلەرى، ق ر پارلامەنتى ءماجىلىسىنىڭ دەپۋتاتتارى، عىلىمي-ساراپتامالىق كەڭەستىڭ قىزمەتكەرلەرى، مەملەكەتتىك ورگانداردىڭ، جوعارى وقۋ ورىندارىنىڭ، عىلىمي جانە شىعارماشىل زيالى قاۋىمنىڭ وكىلدەرى، جاستار، ۇلتتىق اكادەميالىق كىتاپحانانىڭ وقىرماندارى قاتىستى.

اۆتور: رۋسلان عابباسوۆ