جازۋشى ءابدىساتتار وسپانوۆ قازاق ۇلتتىق ونەر ۋنيۆەرسيتەتىنە ءوزىنىڭ كىتاپتارىن تارتۋ ەتتى
«كىتاپ - ادامنىڭ ويىن بايىتىپ، ءبىلىمىن جەتىلدىرەتىن وقۋ قۇرالى. بۇگىنگى جاستار بۇرىنعى ءبىز سياقتى كىتاپقا كوپ ءمان بەرمەيدى. ءبىز بالا كۇنىمىزدە كىتاپتى وقىعاندا جەپ قويا جازدايتىن ەدىك. وسى ورايدا، جاستارعا حالقىمىزدىڭ زاڭعار جازۋشىسى عابيت مۇسىرەپوۆتىڭ «كىتاپ وقۋدان تىيىلساق، وي ويلاۋدان دا تىيىلار ەدىك» دەگەن اتالى ءسوزىن ايتقىم كەلەدى»، - دەدى ءابدىساتتار ءسادۋاقاس ۇلى وقۋ ورداسىنا ءوز كىتاپتارىن ۇسىنىپ جاتىپ.
جازۋشى «ناركەسكەن» اتتى 3 تومدىق تاريحي-كوركەم تريلوگياسىن وقۋ ورداسىنا تارتۋ ەتتى. كىتاپتىڭ نەگىزگى تاقىرىبى ۇلى اتا-بابالارىمىزدىڭ تاريحىن تولىققاندى زەردەلەپ، وتان، تۋعان جەر ءۇشىن قاسىق قانىن اياماعان ءباھادۇر ەرلەردىڭ ەرلىكتەرىن ارقاۋ ەتكەن.
«قالىڭ وقىرماننىڭ نازارىنا ۇسىنىپ وتىرعان بۇل كىتابىم - تاريحىمىزدى دارىپتەيتىن، ەلىن اسپەتتەيتىن قاۋىم ءۇشىن تالعامى بيىك شىعارما. بۇل كىتاپ - بۇگىنگى جاستاردىڭ پاتريوتتىق رۋحىن كوتەرۋدە ماڭىزدى رول اتقاراتىنىنا ەش ءشۇبا كەلتىرمەيمىن»، - دەپ اتاپ ءوتتى اۆتور.
جازۋشىنىڭ ايتۋىنشا، «ناركەسكەن» 3 تومدىق تريلوگياسىن بىلتىر جانقوجا نۇرمۇحامەد ۇلىنىڭ 240 جىلدىق مەرەيتويى قارساڭىندا جازىپ بىتىرگەن. «57 جىل عۇمىرىمدى وسى كىتاپقا ارنادىم. جانقوجا باتىردىڭ بالا كەزىنەن باستاپ، 86 جاسىندا قايتىس بولعانعا دەيىنگى عۇمىرى قامتىلعان. مۇندا باتىر تۋرالى ەل اۋزىنداعى اڭگىمەلەردىڭ مۇراعات قۇجاتتارىمەن سايكەس كەلەتىندەرى عانا كىردى. كەزىندە مۇحامەدجان تىنىشبايەۆ: «جانقوجا باتىر - قازاقتا كوزى تىرىسىندە ءۇش ءجۇزدىڭ ءبيى، ءارى اۋليەسى اتانعان ادام»، دەپ جازىپتى. وسىنداي دەرەكتەر بار»، - دەدى ءابدىساتتار وسپانوۆ.
اۆتورى: كۇنسۇلتان وتارباي
