قازاقستاننىڭ تاۋ-كەن كومپانيالارى بۇرىن-سوڭدى بولماعان داعدارىسقا ۇشىراپ وتىر
بۇگىن قازاقستاننىڭ كاسىپكەرلەر پالاتاسىندا وتكەن باسپا ءسوز ءماسليحاتىندا ق ر ۇ ك پ تاۋ-كەن جانە مەتاللۋرگيا ونەركاسىبى كوميتەتى ءتوراعاسى، «تاۋ-كەن ءوندىرۋشى جانە تاۋ-كەن مەتاللۋرگيا كاسىپورىندارىنىڭ رەسپۋبليكالىق قاۋىمداستىعى» زاڭدى تۇلعالار بىرلەستىگىنىڭ اتقارۋشى ديرەكتورى، «قازاقستان تاۋار وندىرۋشىلەرى مەن ەكسپورتتاۋشىلار وداعى» رەسپۋبليكالىق زاڭدى تۇلعالار بىرلەستىگىنىڭ پرەزيدەنتى نيكولاي رادوستوۆەتس وسىنداي ارنايى مالىمدەمە جاسادى.
«قازاقستاننىڭ تاۋ-كەن كومپانيالارى بۇرىن-سوڭدى بولماعان داعدارىسقا ۇشىراپ وتىر. سەبەبى، تەمىر رۋدالارى شيكىزاتى، جالپى مەتالدىڭ الەمدىك باعالارى 30، 40، 50 پايىزعا دەيىن ارزانداپ كەتتى. تاۋ-كەن كومپانيالارى جۇمىسشىلارىن قىسقارتقان جوق، تەڭگەنىڭ ديەۆالۆاتسياسى دا ورىن المايتىنىن كورىپ وتىرمىز. سوندىقتان قازىر ءبىز مەملەكەتتىڭ نازارىن تارتقىمىز كەلەدى. ءبىز قازاقستاننىڭ كاسىپكەرلەر پالاتاسىمەن بىرگە ءبىرقاتار قولعا الىنۋى ءتيىس شارالاردى تالقىلاپ، ونى مەملەكەت باسشىسىنىڭ باستاماسىمەن قۇرىلعان مودەرنيزاتسيا جونىندەگى كوميسسياعا جولداعىمىز كەلەدى»، - دەدى ول.
ونىڭ ايتۋىنشا، كەيبىر تاۋ-كەن كومپانيالارى قازىرگى ۋاقىتتا تۇتاس قالالاردى جۇمىسپەن قامتىپ وتىر.
«وسى سالاداعى شاعىن جانە ورتا بيزنەستىڭ دە حالى قىل ۇستىندە تۇر. سەبەبى، ءىرى كاسىپورىندار بولماسا، ولاردىڭ دا جۇمىسى توقىراۋعا ۇشىراماق»، - دەدى ول.
ن. رادوستوۆەتستىڭ ويىنشا، تاۋ-كەن سالاسىنداعى كومپانيالارعا ۇزاق مەرزىمدى ءارى ارزان نەسيەلەر اشىلۋى ءتيىس.
«جىل باسىندا مەملەكەت تاراپىنان مىقتى قولداۋ بولدى. ءبىراق ءبىز قازىر ارزان نەسيە جولدارىنا ءزارۋمىز. كوبى قازاقستاندا ەمەس، شەتەل نەسيەلەرىن العان. ولار سونشالىقتى ارزان دا ەمەس. كوميسسيادا ءبىز ۇزاق مەرزىمگە جانە ارزان نەسيەلەردى بەرەتىن كوزدەر تابۋ جونىندە ۇسىنىس جاساعىمىز كەلەدى»، - دەدى ن. رادوستوۆەتس.
كوميتەت ءتوراعاسىنىڭ اتاپ كورسەتكەنىندەي، ول ءۇشىن بىزگە ۇلتتىق بانك قانداي كومەك بەرە الاتىنىن تالقىلاۋ كەرەك.
«ءسوز ەكسپورتقا باعىتتالعان ءىرى كاسىپورىندار تۋرالى بولىپ وتىر. ولاردا قازىر ۋاقىتشا قيىندىقتار تۋدى. بۇل الەمدىك باعالاردىڭ تومەندەۋى، ول تۋرالى ەلباسى دا ايتىپ كەلەدى. قازىر باعا ەڭ تومەنگى شەكتە تۇر، ولار جاقىن بولاشاقتا كۇرت وسەدى. سول كەزدە ولار نەسيەنى قايتارىپ قانا قويماي، ارتىعىمەن پايداعا كەنەلەدى. مەملەكەتكە دە سالىق اعىمىن كوبەيتەدى»، - دەيدى ول.
اۆتور: جاسۇلان جولدىبايەۆ
