قوستاناي وبلىسىندا قىرىلعان كيىكتەردىڭ سانى مىڭنان استى

استانا. قازاقپارات - قوستاناي وبلىسى امانگەلدى اۋدانى جولاباي اۋماعىندا بەلگىسىز سەبەپتەرمەن مەرت بولعان كيىكتەردىڭ سانى مىڭنان استى. بۇل تۋرالى بۇگىن وتكەن بريفينگتە ق ر ا ش م ۆيتسە- ءمينيسترى ەرلان نىسانبايەۆ حابارلادى.

«وزدەرىڭىز بىلەسىزدەر، اتالعان وڭىردە 11 - مامىردا شامامان 117 كيىكتىڭ ۇشاسى تابىلعان بولاتىن. بۇگىنگى كۇنى مەرت بولعان كيىكتەردىڭ سانى 1000 باستان اسىپ وتىر. بۇل ماسەلە بويىنشا باس پروكۋراتۋرا، ەنەرگەتيكا، ءبىلىم جانە عىلىم، دەنساۋلىق ساقتاۋ جانە الەۋمەتتىك دامۋ، ىشكى ىستەر مينيسترلىكتەرى حاباردار ەتىلدى. كيىكتەردىڭ جاپپاي قىرىلۋ فاكتىسى بويىنشا وبلىس اكىمدىگى مەن اۋىل شارۋاشىلىعى مينيسترلىگىندە اۋماقتىق جانە رەسپۋبليكالىق وكىلدەردەن جاساقتالعان شتابتار قۇرىلدى. ولار وقيعانىڭ سەبەپ- سالدارىن انىقتاۋ ۇستىندە»، - دەپ اتاپ ءوتتى ە. نىسانبايەۆ.

ونىڭ ايتۋىنشا، ماماندار سۋ، توپىراق جانە بيولوگيالىق ماتەريالداردىڭ سىنامالارىن الۋدا. كيىكتەردىڭ قىرىلۋ فاكتىسىنىڭ سەبەپتەرىن انىقتاۋ ءۇشىن مەرت بولعان جانۋارلاردان پاتماتەريالدار الىنىپ، رەسپۋبليكالىق ۆەتەرينارلىق زەرتحاناعا جولدانعان. الدىن الا ناتيجەلەر ءبىر اپتادان كەيىن جاريالانادى.

ايتا كەتەيىك، كيىكتەردىڭ جاپپاي قىرىلۋ فاكتىسى ايماقتا سوڭعى رەت جانگەلدى اۋدانىندا 2012 -جىلدىڭ ماۋسىم ايىندا تىركەلگەن. ول كەزدە 926 كيىك پاستەرەللەز اۋرۋىنان مەرت بولعان. الدىن الا ساراپتاما ءۇش جىل بۇرىن ورىن العان جاعدايمەن ۇقساستىعىن انىقتاپ وتىر. ياعني، قىستىڭ ۇزاقتىعى اعزاسى السىرەگەن جانۋارلاردىڭ ينفەكتسيالىق اۋرۋلارعا بەيىمدەلگىش بولىپ، تولدەۋ كەزىندە مەرت بولعان.

2012 -جىلدان باستاپ ق ر ءبىلىم جانە عىلىم مينيسترلىگى بيولوگيالىق قاۋىپسىزدىك ماسەلەلەرى جونىندەگى عىلىمي زەرتتەۋ ينستيتۋتىنىڭ عالىمدارى ارنايى عىلىمي- تەحنيكالىق باعدارلامالاردىڭ اياسىندا كيىكتەردىڭ ينفەكتسيالىق اۋرۋلارىن زەرتتەپ، ولاردى الدىن الۋ ادىستەمەلەرىن ازىرلەۋمەن اينالىسۋدا. قازىرگى تاڭدا عىلىمي- زەرتتەۋ ينستيتۋتىنىڭ قىزمەتكەرلەرىنەن جاساقتالعان كوميسسيا قوستاناي وبلىسىندا جۇمىس ىستەپ جاتىر.

 ۆيتسە- ءمينيستردىڭ ايتۋىنشا، 2014 -جىلى قازاقستاندا كيىكتەردىڭ سانى 256,7 مىڭعا جەتكەن. كيىكتەردى قورعاۋ جانە ءوسىرۋ بويىنشا قولدانىلىپ جاتقان شارالاردىڭ ارقاسىندا سوڭعى ون جىلدىڭ ىشىندە كيىكتەردىڭ سانى رەسپۋبليكا بويىنشا 12 ەسەگە ارتقان. وتكەن جىلى ق ر اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ينسپەكتورلارى كيىك مۇيىزدەرىن ساۋدالاۋعا قاتىستى جانە براكونەرلىك سيپاتتاعى 70 فاكتىنى انىقتاعان.

2015 -جىلدىڭ ءساۋىر- مامىر ايلارىندا «وحوتزووپروم» ءو ب" ينسپەكتورلارى بەتپاقدالا، ورال جانە ءۇستىرت پوپۋلياتسياسىنا كەزەكتى اۋە ساناعىن وتكىزىپ جاتىر.

 

  اۆتور: ءابۋ- اسقار مەكەش ۇلى