جاپونيا- قازاقستان دەپۋتات ايەلدەرىنىڭ كەزدەسۋىن وتكىزۋ قاجەت - م. كاموحارا
بۇل تۋرالى بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا مەن جاپونيانىڭ قازاقستانداعى ەلشىسى ماساەسي كاموحارا كەزدەسۋىنەن كەيىن ب ا ق وكىلدەرىنە سۇحبات بەرگەن ءماجىلىس دەپۋتاتى ەلەنا تاراسەنكو ايتتى.
«كەزدەسۋ بارىسىندا ق ر مەملەكەتتىك حاتشىسى جاپونيا پرەمەر- مينيسترىنەن بۇكىل الەمدىك ايەلدەر كونفەرەنتسياسىنا شاقىرتۋ الدى. ايتا كەتەرلىگى، بۇل فورۋم اتالعان ەلدىڭ ۇكىمەت باسشىسىنىڭ باستاماسىمەن ەكىنشى رەت وتكەلى وتىر. القالى جيىندا گەندەرلىك تەڭدىك ماسەلەلەرى تالقىلانىپ، ونى دامىتۋداعى تاجىريبەلەر الماسىلادى» ، - دەدى ە. تاراسەنكو.
سونىمەن قاتار دەپۋتات كەزدەسۋ بارىسىندا پارلامەنتارالىق ىنتىماقتاستىق ماسەلەلەرى دە تالقىعا تۇسكەنىن اتاپ ءوتتى.
«اتاپ ايتقاندا، جاپون تارابى قازاقستاننىڭ دەپۋتات ايەلدەرىن جاپونيانىڭ دەپۋتات ايەلدەرىمەن كەزدەسۋگە قاتىسۋ ءۇشىن شاقىرتۋ جاسادى. ولار جاپونيادا ايەل مينيسترلەردىڭ كوپ ەكەندىگىن ايتتى. قازاقستاندا دا ايەلدەر ماڭىزدى بيلىك تىزگىنىن ۇستاپ وتىر. سوندىقتان مۇنداي ەكىجاقتى كەزدەسۋلەر بارىنشا قىزىقتى ءارى پايدالى بولماق» ، - دەدى ول.
