ق ر ۇلتتىق مۋزەيىنىڭ ەكسپوناتتارىنا شەتەلدىكتەر زور قىزىعۋشىلىق تانىتىپ وتىر
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا اتالعان مۋزەيدىڭ ديرەكتورى دارحان مىڭباي ءمالىم ەتتى.
«ۇلتتىق مۋزەيگە اشىلعالى كوپ ۋاقىت وتپەسە دە، بىزگە 160 مىڭنان استام ادام كەلىپ، ونىڭ 10 مىڭنان استامى شەتەلدىكتەر. بۇل تۇرعىدا مۋزەيگە دەگەن ۇلكەن قىزىعۋشىلىقتى بايقاپ وتىرمىز»، - دەدى ول.
وسى ورايدا د. مىڭباي كوشپەلى كورمەلەر جاڭا ترەندكە اينالعانىن ايتا كەلە، بۇل تۇرعىدا بارشا الەمنەن جاڭا ەكسپوزيتسيالار الىنىپ، اۆتورلار شاقىرىلاتىندىعىن، سونداي- اق قازاقستاننىڭ مادەني مۇراسىن بۇكىل الەمگە تانىتۋ ءۇشىن ۇلتتىق مۋزەي دە شەتەلگە شىعاتىندىعىن اتاپ ءوتتى.
«بۇگىندە ۇلتتىق مۋزەيدە 170 مىڭنان استام ەكسپونات جينالدى. وعان قوسا ءبىز تاعى دا «ۇلتتىق مۋزەيگە سىي تارتۋ» دەگەن اكسيانى ۇيىمداستىرعانبىز. ونىڭ بارىسىندا ك. ازىربايەۆتىڭ، ج. ناجىمەدەنوۆتىڭ، ش. قالداياقوۆتىڭ، كەڭەس وداعىنىڭ باتىرى ق. قايسەنوۆتىڭ جانە باسقا دا ۇلكەن ازاماتتاردىڭ جەكە زاتتارى دا مۋزەيگە سىيعا بەرىلدى. بۇل تۇرعىدا وسى قۇندى زاتتاردى ساقتاۋعا بارلىق جاعدايلار جاسالعان»، - دەدى د. مىڭباي.
ونىڭ سوزىنە قاراعاندا، مۋزەيدىڭ نەگىزگى ماقساتى ەكسپوناتتاردى كورسەتۋ عانا ەمەس، سونىمەن قاتار عىلىمي جۇمىستاردى جالعاستىرۋعا، عىلىمي كوزقاراسپەن ساراپتاۋعا، ءتول مادەنيەتىمىز بەن مۇرامىزدى بۇكىل الەمگە كورسەتۋگە باعىتتالعان. «مۋزەيگە كەلگەن ادام قازاقتىڭ، قازاقستاندىقتاردىڭ كىم ەكەنىن تانىپ شىعۋى كەرەك. سوندىقتان دا بۇگىنگى جەتىستىگىمىزدى نەمەسە الداعى جوسپارىمىزدىڭ بارلىعىن ەلباسىنىڭ تاپسىرماسىمەن بايلانىستىرامىز» ، - دەدى ول.
ءسوز سوڭىندا د. مىڭباي حالىقارالىق مۋزەيلەر كۇنى اياسىندا 18 - مامىردا ۇلتتىق مۋزەيدە «مۋزەي ءتۇنى» اكسياسى وتەتىندىگىن جەتكىزدى. سول كۇنى وندا تاقىرىپتىق ەكسكۋرسيالار ۇيىمداستىرىلادى جانە قالا تۇرعىندارى جاڭا ەكسپوناتتارمەن تانىسۋ مۇمكىندىگىنە يە بولادى.
اۆتور: رۋسلان عابباسوۆ
