ساۋد ارابياسى ق ر ۇكىمەتىنەن قازاقستاندىق استىقتىڭ ەكسپورتى ءۇشىن جەڭىلدىكتەر سۇرادى

 استانا. قازاقپارات - ساۋد ارابياسى ق ر ۇكىمەتىنەن قازاقستاندىق استىقتىڭ ەكسپورتى ءۇشىن جەڭىلدىكتەر جاساۋدى سۇرادى. بۇنداي ۇسىنىستى بۇگىن استانادا ەكى ەلدىڭ وكىلدەرىنىڭ قاتىسۋىمەن ءوتىپ جاتقان بيزنەس- فورۋمدا ساۋد ارابياسى ساۋدا پالاتالارى كەڭەسىنىڭ ءتوراعاسى ابدۋلراحمان ءال- زاميل ايتتى. 

«ەكى ەلدىڭ كاسىپكەرلەر كەڭەستەرىنىڭ جۇمىستارى جاندانعاننان كەيىن، ق ر ۇكىمەتى استىقتى قازاقستاننان ساۋد ارابياسىنا ەكسپورتتاۋ ءۇشىن جەڭىلدىكتەر ۇسىنۋ تۇرعىسىندا مينيسترلىكتەرمەن بىرگە ءتيىستى شەشىمدى تابۋىمىز كەرەك. سەبەبى قازاقستاندىق استىقتىڭ ساپاسى وتە جوعارى»، - دەدى ابدۋلراحمان ءال- زاميل.

سونىمەن قاتار ول ءوز سوزىندە ەكى ەل اراسىندا مۇناي حيمياسى سالاسىنداعى ىنتىماقتاستىقتىڭ الەۋەتى جوعارى ەكەنىن جەتكىزدى. «ءبىز قازاقستانمەن مۇناي حيمياسى ونىمدەرىن جەتكىزۋ باعىتىندا قاتىناستاردى دامىتۋعا نيەتتىمىز»، - دەدى ول.

مۇنىمەن قوسا ساۋدا پالاتالارى كەڭەسىنىڭ ءتوراعاسى بىرلەسكەن جوبالاردى جۇزەگە اسىرۋ تابىستى بولۋى ءۇشىن ەكى ەل اراسىندا تىكەلەي اۋە باعدارلارىنىڭ سانىن كوبەيتۋ كەرەكتىگىن اتاپ ءوتتى.

اۆتور: رۋسلان عابباسوۆ