قازاقستان قىلمىسكەرلەردى ۇستاپ بەرۋ تۋرالى ءبىرقاتار مەملەكەتتەرمەن شارت جاساۋدى جوسپارلاپ وتىر - ي. مەركەل

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى مەن رۋمىنيا اراسىنداعى ادامداردى ۇستاپ بەرۋ تۋرالى شارتتى راتيفيكاتسيالاۋ تۋرالى» زاڭ جوباسى ماقۇلداندى.

اتالعان كەلىسىمگە بىلتىرعى جىلى 14 - قاراشادا قول قويىلعان. قۇجاتتى راتيفيكاتسيالاۋ ەلدەر اۋماعىندا قىلمىس جاساعان تۇلعالاردى تاراپتاردىڭ ءوزارا ەكستراديتسيالاۋىنا مۇمكىندىك تۋدىرادى.

 «كەلىسىم بويىنشا قازاقستاندا قىلمىس جاساپ، رۋمىنيادا جاسىرىنىپ جۇرگەن تۇلعالاردى ۇستاپ بەرۋدى تالاپ ەتە الاتىن بولامىز. قۇجاتتىڭ شارتتارىنا سايكەس، ەكى ەلدە دە قىلمىس دەپ تانىلاتىن قىلمىستىق ارەكەتتەردى جۇزەگە اسىرعانى ءۇشىن جانە سول قىلمىسى ءۇشىن ءبىر جىلدان كەم بولمايتىن جازالار قاراستىرىلاتىن تۇلعالاردى ۇستاپ بەرۋ جۇزەگە اساتىن بولادى. ەگەر سۇراۋ سالىناتىن تۇلعا سوتتالعان بولسا، وندا ونى ەكستراديتسيالاۋ ءۇشىن جازاسىن وتەۋ مەرزىمىنىڭ اياقتالۋىنا التى اي شاماسىندا مەرزىم قالعان بولۋى كەرەك. سونىمەن قاتار، شارت بويىنشا ۇستاپ بەرۋدەن باس تارتۋ جاعدايلارى دا ايقىندالىپ وتىر. ماسەلەن، ەگەر سۇراۋ سالىنعان ادامعا ساياسي باسپانا بەرىلگەن بولسا، ول ەكستراديتسيالانبايدى» ، دەدى ق ر باس پروكۋرورىنىڭ ورىنباسارى يوگان مەركەل.

 ونىڭ ايتۋىنشا، قازاقستان ءدال وسىنداي قىلمىسكەرلەردى ۇستاپ بەرۋ تۋرالى كەلىسىمدى بۇعان دەيىن 12 مەملەكەتپەن جاساعان. اتاپ ايتقاندا، ولاردىڭ اراسىندا قىتاي، كورەيا، موڭعوليا، تۇركيا، اراب امىرلىكتەرى، ۇندىستەن سەكىلدى مەملەكەتتەر بار.

«الداعى پەرسپەكتيۆادا قازاقستان قىلمىسكەرلەردى ۇستاپ بەرۋ تۋرالى پاكىستان، ۆەتنام، مالايزيا، برازيليا، ساۋد ارابياسى سەكىلدى ءبىرقاتار مەملەكەتتەرمەن شارت جاساسۋدى جوسپارلايدى» ، دەدى ي. مەركەل.

ءماجىلىس ماقۇلداعان زاڭ جوباسى پارلامەنت سەناتىنا جولدانادى.

اۆتور: قانات مامەتقازى ۇلى