الماتى زووباعىندا سولتۇستىك امەريكالىق كورولدىك جىلاننىڭ جۇمىرتقا سالۋ ءساتى تۇڭعىش رەت فوتوعا ءتۇسىرىلدى

الماتى. قازاقپارات- بۇگىن الماتىنىڭ حايۋاناتتار باعىندا وسىدان ءبىر ساعات ۋاقىت بۇرىن سولتۇستىك امەريكالىق كورولدىك جىلان جۇمىرتقا سالا باستادى.  

بۇل تۋرالى قازاقپارات تىلشىسىنە زووباقتىڭ باسپا ءسوز حاتشىسى ميحايل سوروكوۋموۆ حابارلادى.

«جۇمىرتقا سالۋ ءساتىن فوتوعا تۇسىرۋگە قول جەتكىزىلدى. بۇل ۇدەرىس نەگىزى 12 ساعاتقا سوزىلۋى مۇمكىن. ادەتتە مۇنداي جىلاندار 3 جۇمىرتقادان 12 جۇمىرتقاعا دەيىن سالادى. ەكزوتاريۋمنىڭ جۇمىسشىسى يسرايل يسايەۆ جىلاننىڭ تاڭەرتەڭ جۇمىرتقالاي باستاعانىنا تاڭ قالعان. ويتكەنى ولار جۇمىرتقانى تەك تۇنگى ۋاقىتتا عانا سالاتىن بولعان. بۇل بيىلدىققا العاشقى جۇمىرتقالار » - دەدى م. سوروكوۋموۆ.

ونىڭ ايتۋىنشا، جىلاندى مازالاماس ءۇشىن ول بولەك قوراپقا سالىنىپتى. ال جۇمىرتقالار 60 تاۋلىككە دەيىن ينكۋباتورعا سالىنادى.  

اۆتور:   جاپپاربەرگەن ايبوتا