ب ق و: «قىز جىبەك» ءانسامبلى رەسپۋبليكالىق بايقاۋدا ءۇش بىردەي باس جۇلدەنى ەنشىلەدى - فوتو

ورال. قازاقپارات - «مايرا» پروديۋسەرلىك ورتالىعىنىڭ ۇيىمداستىرۋىمەن الماتى قالاسىندا مارەگە جەتكەن رەسپۋبليكالىق «سامعا، جۇلدىز» بالالار مەن جاسوسپىرىمدەر بايقاۋىندا قازتالوۆ اۋدانى جالپاقتال اۋىلىنان بارعان «قىز جىبەك» ءانسامبلى ءۇش بىردەي باس جۇلدەنى ەنشىلەدى.

انسامبل جەتەكشىسى، «ەرەن ەڭبەگى ءۇشىن» مەدالىنىڭ يەگەرى بايان قابيەۆانىڭ ايتۋىنشا، «قىز جىبەك» تەرمەشىلەر ءانسامبلى «دومبىرامەن ءان سالۋ» اتالىمىنان، جەكە ورىنداۋشىلار اراسىندا جوعارى توپتان ءامينا عاينەدينوۆا، ورتا توپتان ءمولدىر نۇعمانوۆا باس جۇلدەنى جەڭىپ السا، ۆەنەرا اسقاروۆا ءبىرىنشى ورىنعا كوتەرىلدى.

باتىس قازاقستاندىق بالعىن ونەرپازدار ەسترادا جانە «دومبىرامەن ءان سالۋ» اتالىمى بويىنشا سىنعا ءتۇستى. «قىز جىبەك» ءانسامبلى «ەستايدىڭ تەرمەسى»، كەنەننىڭ «وي، جايلاۋ»، تاتار حالىق ءانى «اي بىلبىلىم»، ا. نوۆيكوۆتىڭ «سمۋگليانكا»، ا. بولتانوۆتىڭ «تاۋەلسىز ەلىم جاساسىن!» اندەرىن ورىنداپ، كوپشىلىك قوشەمەتىنە بولەندى.

سونداي-اق جالپاقتالدىق جاس انشىلەر «قۇمار تەرمەسى»، حالىق ءانى «بالجان-اي»، «جەلكىلدەك»، ع. قۇرمانعاليەۆتىڭ «ءانشى داۋسى» سىندى تۋىندىلاردى ورىنداپ، الدارىنا جان سالمادى.

قازاق كونسەرتتە وتكەن، وسىمەن ءۇشىنشى رەت ۇيىمداستىرىلىپ وتىرعان اتالمىش بايقاۋعا رەسپۋبليكانىڭ تۇكپىر-تۇكپىرىنەن جۇزدەن استام ونەرلى بالالار قاتىستى. ولارعا «مايرا» پروديۋسەرلىك ورتالىعىنىڭ ديرەكتورى، ق ر ەڭبەك سىڭىرگەن ءارتىسى مايرا ءىلياسوۆا، بەلگىلى ءانشى، اكتريسا مەرۋەرت تۇسىپبايەۆا، «جىگىتتەر» كۆارتەتىنىڭ پروديۋسەرى ەرعالي ءابدىرايموۆ سىندى ونەر مايتالماندارى تورەلىك ەتتى.