ش ق و اكىمى سۋ تاسقىنىنان زارداپ شەككەن ەلدى مەكەندەردەگى قالپىنا كەلتىرۋ جۇمىستارىنىڭ بارىسىن تەكسەردى

استانا. قازاقپارات - ش ق و اكىمى دانيال احمەتوۆ سۋ تاسقىنىنان زارداپ شەككەن سەگىز ەلدى مەكەندەگى قالپىنا كەلتىرۋ جۇمىستارىنىڭ بارىسىمەن تانىستى، بۇقتىرما وزەنىن قاراپ شىقتى.

بۇل تۋرالى ش ق و اكىمدىگىنىڭ سايتىندا حابارلانادى.

وبلىس اكىمى اپاتتان زارداپ شەككەن سنەگيريەۆو اۋىلىنىڭ تۇرعىندارىمەن كەزدەستى. ول ۇيلەر مەن شارۋاشىلىق قۇرىلىستارىنىڭ جاعدايىن قاراپ شىقتى.

27-28- ساۋىردە بۇقتىرما مەن حامير وزەندەرىندە سۋ دەڭگەيى كوتەرىلىپ، زۋبوۆسك، مالەيەۆسك، پۋتينتسيەۆو، بىكوۆو، بوگاتىريەۆو، بايانوۆسك، پارىگينو، سنەگيريەۆو ەلدى مەكەندەرىن ءىشىنارا سۋ باستى. 860 ادام قاۋىپسىز جەرگە كوشىرىلدى.

273 ءۇي قۇرىلىسى زاقىمداندى. 172 ءۇيدى سۋ باسىپ، 101 ءىن سۋ شايىپ كەتتى. 45 ءۇي قۇرىلىسى قالپىنا كەلتىرۋگە جاتپايدى. قازىر وزەن ءوز ارناسىنا ءتۇستى. تۇرعىندار ۇيلەرىنە ورالدى. سۋ شايعان بوگەتتەر مەن جولدار جوندەلىپ جاتىر.