جاڭا زاڭ جاس انالاردىڭ اشۋىنا ءتيدى

استانا. قازاقپارات - بەلگيادا ايەلدەر دەنساۋلىعىن قورعاۋ سالاسىندا مىندەتتى مەديتسينالىق كومەك قارجىسى كەزەكتى رەت قىسقارتىلدى.

بۇدان بىلاي، بوسانعان ايەلدەردى ءتورت كۇننەن ارتىق ۇستاعان پەرزەنتحانا قىزمەتكەرلەرى 200 مىڭنان 800 مىڭ ەۋروعا دەيىن ايىپپۇل تولەۋى مۇمكىن، دەپ جازادى 24.kz.

جاعىمسىز جاڭالىقتى ەستىپ، جاڭا تۋىلعان شاقالاقتارى ءۇشىن شىرىلداعان انالاردىڭ وكپەلەرى قارا قازانداي. ازىرگە تەك فلاندريادا ەنگىزىلىپ جاتقان جاڭا زاڭنامالىق نورماعا سايكەس، بوسانىپ، ءسابيىن باۋىرىنا العان ايەلدەر پەرزەنتحانادا 96 ساعاتتان ارتىق قارالا المايدى. تەك دەنساۋلىعى سىر بەرگەندەرى عانا ءسال ەمدەلە تۇرۋعا قۇقىلى. بيلىكتىڭ بۇل شەشىمى فلاماند گينەكولوگتار قاۋىمداستىعى مەن جاس انالاردىڭ شامىنا تيگەن.

جاس انالار ەندى تەك شاقىرتۋمەن قىزمەت ەتەتىن اكۋشەرلەردىڭ كومەگىنە جۇگىنە الادى. ۇيگە ورالعان العاشقى مەزەتتە ۋچاسكەلىك مەدبيكە قارايلاسادى. تەك بۇل جاردەم دە ايتارلىقتاي جارىتىمدى ەمەس، اپتاسىنا نەبارى 35 ساعات. ال وتباسىلىق ورتالىق قىزمەتكەرلەرىن شاقىرتۋشىلاردىڭ سانى كۇننەن-كۇنگە ارتىپ كەلەدى.

ايتا كەتەرلىگى، بيلىك وكىلدەرى ارنايى زاڭ جوباسىن ازىرلەۋ كەزىندە بۇل وزگەرىستەردىڭ ساناۋلى كلينيكالاردا تاجىريبە رەتىندە ەنگىزىلەتىنىن ايتقان، الايدا ءىس جۇزىندە ەلدىڭ فلاماندتىق بولىگىندە زاڭ تولىقتاي قولدانىلۋدا. الەۋمەتتىك ساقتاندىرۋ كومپانيالارى شاقىرتۋ بويىنشا قىزمەت ەتەتىن بارلىق اكۋشەرلەردىڭ تولەماقىسىن وتەي الاتىندارىنا ءشۇبالانىپ وتىر.