كاسىپتى ءناسىپ ەتكەن جۇلدىزدار

استانا. قازاقپارات - شوۋ- بيزنەس الەمىندە تانىمال ادامداردىڭ اراسىندا جەكە كاسىپكەرلىكپەن اينالىسىپ، ءوزىنىڭ ءىسىن دوڭگەلەتىپ وتىرعاندارى دا بار.

جەكە ستۋديا، پروديۋسەرلىك ورتالىق سەكىلدى شوۋ- بيزنەسكە قاتىستى دۇنيەلەردەن بولەك مەيرامحانا بيزنەسى، ديزاينەرلىك كيىمدەر، ۇلتتىق ويىنشىقتار شىعارۋمەن قارجى تاۋىپ جۇرگەن «جۇلدىزداردىڭ» تابىسى قانداي، ولاردىڭ جەكە بيزنەسى قانشالىقتى پايدا اكەلەدى؟

نەگىزىنەن جەكە كاسىپكەرلىكپەن اينالىسۋدا الەمدىك جۇلدىزداردىڭ جەتكەن جەتىستىگى ءبىراز ادامعا ۇلگى بولارلىقتاي. ايتالىق اتاقتى اكتريسا، ەكى بالانىڭ اناسى دجەسيكا البا ەكولوگيالىق تازا، زيانسىز جورگەك شىعاراتىن كومپانيانىڭ نەگىزىن قالاعان بولاتىن. Honest Company اتتى ماركامەن شىعارىلعان كىشكەنتاي بوبەكتەرگە ارنالعان جورگەكتەردى شىعارۋداعى ماقسات - بالالاردىڭ دەنساۋلىعىنا زياندى حيميالىق زاتتاردى پايدالانباۋ. سونداي- اق اتى الەمگە ايگىلى اكتەر برەد پيتت جيھاز وندىرىسىمەن اينالىسادى ەكەن. ول ءوزىنىڭ فرانكو پوللارو اتتى ارىپتەسىمەن بىرگە Pitt-Pollar جيھاز كوللەكتسياسىن ۇسىنادى. ولار نەگىزىنەن ۇستەلدەر، بارعا ارنالعان ورىندىقتار، كرەسلو، جاتىن بولمەگە ارنالعان جيھازدار جاسايدى.

 ال رەسەيدىڭ تانىمال جۇلدىزدارىنىڭ اراسىندا بەلگىلى قوعام قايراتكەرى، جەكە كاسىپكەر كسەنيا سوبچاك ماسكەۋدە «بۋبليك» اتتى ءدامحانا اشقان ەكەن. بۇل جوباعا سوبچاك 17 ميلليون رۋبل جۇمساعان. بيزنەس- لەدي بولاشاقتا وسى ءدامحانانى ۇلكەن جەلىگە اينالدىرۋدى كوزدەپ وتىرعان كورىنەدى.

 رەسەيدىڭ پريمادونناسى اللا پۋگاچيەۆانىڭ ءوز قارجىسى وزىنە جەتەتىن بولسا دا، ول ماسكەۋ وريتالىعىنان دارىندى بالالارعا ارنالعان ەليتالى مۋزىكالىق مەكتەپ اشقان. ول وسى مەكتەپتىڭ كوركەمدىك جەتەكشىسى. سونداي- اق اللا پۋگاچيەۆا ءبىراز جىلدان بەرى اياق كيىم بيزنەسىمەن دە اينالىسىپ كەلەدى. ول 1996 -جىلدان بەرى «ەكونيكا» فيرماسىمەن كەلىسىمشارت جاساسىپ، ايەلدەردىڭ اياق- كيىم برەندىنە ءوز اتىن بەرگەن. بۇگىندە Alla Pugachova اياق كيىمدەرى ۇلكەن سۇرانىسقا يە.

رەسەي شوۋ- بيزنەسىنىڭ تاعى ءبىر وكىلى، بەلگىلى ءانشى لاريسا دولينا ءبىراز ۋاقىت فرانسۋز يىسسۋىمەن بيزنەس جاساپ كوردى. لاريسا دولينا دەپ اتالعان ءيىسسۋ نەگە ەكەنى بەلگىسىز اسا سۇرانىسقا يە بولا الماپتى. وسى بيزنەسكە لاريسا قىرۋار قارجى جۇمساعانى دەسەدى. الايدا كاسىبى ءساتسىز بولعان.

ال ەندى ءوزىمىزدىڭ وتاندىق جۇلدىزداردىڭ كاسىبى تۋرالى ايتايىق. بۇگىندە مەيرامحانا بيزنەسىن جاقسى جولعا قويىپ العان انشىلەردىڭ ءبىرى ەرلان كوكەيەۆ. بۇرىنعى «ا ب ك» توبىنىڭ ءسوليسى «رەترو شلياگەر» مەيرامحاناسىن الماتى قالاسىندا اشىپ، 5  جىلداي ءساتتى جۇمىس ىستەدى. قازىر ەرلان مىرزا مەيرامحاناسىن استانا قالاسىندا اشۋ ءۇشىن ەلورداعا وتباسىمەن قونىس اۋدارعان.

تاعى ءبىر تانىمال كاسىپكەرلەردىڭ ءبىرى - قىدىرالى بولمانوۆ. اتاقتى پروديۋسەر 2011 -جىلى Bal-Balا اتتى برەندپەن ينتەراكتيۆتى ۇلتتىق ويىنشىقتار شىعارا باستاعان بولاتىن. بولمانوۆ مىرزانىڭ ويىنشىقتاردى قۇراستىراتىن ءوندىرىس ورنى الماتى قالاسىندا ورنالاسقان. وندا 17 ءتۇرلى ويىنشىق وندىرىلەدى: 11 جۇمساق ويىنشىق، 4 اۆتورلىق، قالعان ەكەۋى ازيادا-2011 دوداسىنا ارنايى تاپسىرىسپەن شىعارىلعان ويىنشىقتار. پروديۋسەردىڭ قولىنان شىققان ويىنشىقتار قازاقشا سويلەيدى، ولەڭ ايتادى. كاسىپكەردىڭ ايتۋىنشا، بۇل جوباعا 1 ميلليون دوللار قارجى سالىنعان.

 ەلىمىزدەگى ەڭ ىسكەر نازىكجاندىلاردىڭ ءبىرى -  بايان ەسەنتايەۆا. قانداي ءىستى قولعا السا دا ءساتتى ەتۋگە تىرىساتىن جانە پايدا تۇسىرە بىلەتىن بايان حانىم باسشىلىق ەتەتىن Shine پروديۋسەرلىك ورتالىعىنىڭ تابىسى جامان ەمەس. الايدا ەسەنتايەۆا ءوزىنىڭ ىسكەرلىگىنىڭ ارقاسىندا بىلتىرعى جىلى بەلگىلى پروديۋسەر ەريك تاستامبەكوۆپەن بىرلەسىپ Central اتى كوفەينيا اشقانىن جاريالاعان بولاتىن. بۇگىندە الماتىداعى وسى ءبىر كوفەينيادا الماتىلىقتار ادەمى كەشتەرىن وتكىزەدى.

بايان حانىمنان ديليناز احمادييەۆا دا قالىسپايدى. ءانشى قۇرعان Embassy of Art پروديۋسەرلىك ورتالىعى ءتۇرلى جوبالارمەن، سونىڭ ىشىندە قايىرىمدىلىق شارالارىمەن اينالىسادى ەكەن.

قازاق شوۋ- بيزنەسىنىڭ تورىنەن ورىن العان قايرات نۇرتاستىڭ تەك اندەرى حيت بولادى دەپ ويلاساڭىز قاتەلەسەسىز. قايراتقا ەلىكتەيتىن جاستار قايرات نۇرتاس برەندىمەن شىعارىلعان كيىمدەرگە دە اسا قىزىعۋشىلىق تانىتادى. بىلتىرعى جىلى تانىمال ءانشى ءوز اتىمەن اتالاتىن كيىم برەندىن شىعارعان بولاتىن. قايرات نۇرتاستىڭ فيرمالىق بۋتيكتەرىن الماتى، استانا قالالارىندا ورنالاسقان ۇلكەن ساۋدا ورتالىقتارىنان تابۋعا بولادى. بۇل بۋتيكتەردە ەرلەرگە، ايەلدەرگە ارنالعان كيىمدەر، اياق كيىمدەر، سومكەلەر دە بار.

«الاش ايناسى»