سۇراپىل سوعىس پەن ونىڭ قۇرباندارى جايلى ەستەلىك ءبىزدىڭ قانىمىزدا ساقتالادى - سوعىسقا قاتىسقان ساربازدار ۇرپاقتارى - فوتو

وسكەمەن. قازاقپارات - وسكەمەندەگى ەرتىس جاعالاۋىنداعى «ماڭگىلىك پولك» شاراسىنا ۇلى وتان سوعىسىندا شايقاسقان ساربازداردىڭ مىڭداعان پورترەتتەرىن ولاردىڭ ۇرپاقتارى الىپ شىقتى.

اكەلەرى مەن اتالارىنىڭ سۋرەتتەرىن الىپ شىققان قاۋىم سوعىس جىلدارىنداعى اندەردى شىرقادى. ولار ورتا جولدا كۇتىپ العان وركەستردىڭ جانىندا ءسال بوگەلدى دە، داڭق مەموريالىنا قاراي بەت الدى.

«مەن اكەم حايزين يۆان پاۆلوۆيچتىڭ پورترەتىن الىپ شىقتىم، ول 1943-جىلى مامىردان حابار-وشارسىز كەتتى، - دەيدى پەداگوگ ۆالەنتينا يۆانوۆنا ماكارەنكوۆا. - اكەم 1942-جىلى ناۋرىزدا لەنينوگوردان شاقىرىلعان. ءبىر اپتادان كەيىن مەن دۇنيەگە كەلدىم. وسى جىلدار بويى ونى ىزدەۋمەن كەلەمىز، قاي جەردە قازا بولىپ، قايدا جەرلەنگەنىن بىلمەيمىز. انامنىڭ ايتۋى بويىنشا مەنىڭ مىنەزىم اكەمە قاتتى ۇقسايدى ەكەن. تاباندىلىق پەن ومىرگە دەگەن قۇشتارلىق اكەمنىڭ قانىنان بويىما دارىسا كەرەك، اكەمە دەگەن العىسىم شەكسىز.

قىزىم ۇلتى نەمىس ازاماتقا تۇرمىسقا شىقتى، قازىر گەرمانيادا تۇرادى. ءالى كۇنگە دەيىن اكەمدى ىزدەپ ءجۇرمىز. ورىس پەن نەمىس قانى ارالاسقان ەكى نەمەرەم دە ونىڭ رۋحىنىڭ الدىندا تاعزىم ەتكەنىن قالايمىن».

«ماڭگىلىك پولكتىڭ» تاعى ءبىر اسكەري ساربازى راشيد قاباي ۇلى مۇحامەدجانوۆ جايلى 68 جاستاعى ۇلى بايانداپ بەردى: «اكەم سوعىستىڭ باسىنان اياعىنا دەيىن ايقاستى. باتالون كومانديرى بولدى، ءۇش رەت جارالانعان. ونىڭ 20 ناگراداسى بار. اكەم سوعىستان امان-ساۋ ورالدى. بەيبىت ومىردە قازاقستاننىڭ كوپتەگەن وڭىرلەرىندە اسكەري كوميسسار بولىپ قىزمەت اتقاردى. 1995-جىلى دۇنيەدەن وزدى.

ءبىز سۇراپىل سوعىستا جان اياماي كۇرەسىپ، بەيبىتشىلىككە قول جەتكىزگەن بابالارىمىزعا ءومىر بويى باس ءيىپ وتەمىز. ولاردىڭ اماناتىن ۇرپاقتان-ۇرپاققا تابىستاۋعا، اشىق اسپاندى ساقتاۋعا جاۋاپتى بولامىز».

«ماڭگىلىك پولكتىڭ» شەرۋى 109 شىعىس قازاقستاندىق كەڭەس وداعى باتىرلارىنىڭ اللەياسىمەن داڭق مەموريالىنا دەيىن ءجۇرىپ ءوتىپ، سوعىستا قازا تاپقانداردى ءبىر مينۋت ۇنسىزدىكپەن ەسكە الدى.