ابايدىڭ ولەڭدەرى اراب تىلىنە اۋدارىلىپ، تاياۋ شىعىس ەلدەرىنە تارالماق

ءابۋ- دابي. قازاقپارات - بۇگىنگى كۇندەرى بىرىككەن اراب امىرلىگىنىڭ استاناسىندا جىل سايىنعى حالىقارالىق كىتاپ كورمەسى وتۋدە، وعان الەم ەلدەرىنىڭ كىتاپ باسپالارى قاتىسىپ جاتىر.

 ءابۋ- دابيدەگى شارادا 600 دەن استام اۆتوردىڭ 500 مىڭنان استام كىتاپتارى ۇسىنىلعان. ولاردىڭ ىشىندە قازاقستاندىق كىتاپ ونىمدەرى دە بار. ءبىزدىڭ ەلىمىز ءۇشىنشى جىل قاتارىنان مۇندا ءوز پاۆيلونىن كوپشىلىك نازارىنا ۇسىنۋدا.

 قازاقستاندىق دەلەگاتسيا قۇرامىنىڭ ايتۋىنا قاراعاندا، مۇندا قويىلعان كىتاپتاردا قازاقستاندا بولىپ جاتقان وقيعالار بەينەلەنگەن. مەملەكەت باسشىسى نۇرسۇلتان نازاربايەۆتىڭ بيوگرافياسىمەن قوسا، قازاق حاندىعىنىڭ 550 جىلدىعىنا جانە قازاقستان حالقى اسسامبلەياسى جىلىنا ارنالعان كىتاپتار بار.

ق ر ۇلتتىق مەملەكەتتىك كىتاپ پالاتاسىنىڭ باسشىسى جانات سەيدۋمانوۆتىڭ اتاپ وتۋىنشە، دەلەگاتسيا قۇرامىندا التى قازاقستاندىق باسپا بار.

«بۇل كورمە بارىسىندا بىرنەشە ىسكەرلىك كەزدەسۋلەر مەن شارالار ءوتتى، قازاق اقىندارى مەن جازۋشىلارىنىڭ كىتاپتارىن اراب تىلىندە شىعارۋ جۇمىستارى جوسپارلانىپ وتىر. ءبىز ارابتىق تاراپپەن ابايدىڭ ولەڭدەر كىتابىن اراب تىلىندە شىعارىپ، ونى اراب تىلدەس ەلدەرگە تاراتۋ تۋرالى كەلىسىمگە كەلدىك»، - دەدى ج. سەيدۋمانوۆ.

ءابۋ- دابيدەگى ADNEC كورمە ورتالىعىندا ءوتىپ جاتقان شارا 14 - مامىرعا دەيىن جالعاسادى.