قازاقستان ەلەكتر قۋاتىن اۋعانستان مەن پاكىستانعا ساتۋدى جوسپارلاۋدا
بۇل تۋرالى بۇگىن ورتالىق كوممۋنيكاتسيالار قىزمەتىندە ق ر ەنەرگەتيكا مينيسترلىگى ەلەكتر ەنەرگەتيكا دەپارتامەنتىنىڭ ديرەكتورى باۋىرجان سارسەنوۆ ءمالىم ەتتى.
ونىڭ ايتۋىنشا، ول ءۇشىن تورعاي جانە ەكىباستۇزدا ەلەكتر ستانسالارى سالىنۋى ءتيىس.
«قازاقستاننىڭ ەلەكتر جۇيەلەرىنىڭ دامۋ الەۋەتتەرىنىڭ ءبىرى رەتىندە قىتايدىڭ ورتالىق جانە شىعىس بولىگىنە دەيىن 800 كيلوۆولت تۇراقتى توق جەلىسىن تارتۋ جوباسى قارالۋدا.
قازاقستاننىڭ ەلەكتر قۋاتىن ەكسپورتقا شىعارۋ، سونىڭ ىشىندە قىتايعا ساتۋ ماقساتىندا تورعاي جانە ەكىباستۇز ايماقتارىندا جاڭا ەلەكتر ستانسالارىن سالۋ كوزدەلۋدە. سونىمەن قاتار ورتالىق ازيا ەلدەرى - قىرعىزستان، تاجىكستان جانە وڭتۇستىك ازيا مەملەكەتتەرى - اۋعانستان، پاكىستاندى قوساتىن CASA-1000 جاڭا ەلەكتر جۇيەسى سالىنىپ جاتىر.
بۇل جەلى قىسقى مەرزىمدەردە قازاقستان ءوزىنىڭ ەلەكتر قۋاتىن قىرعىزستان، تاجىكستان ەلدەرىنە، ارى قاراي اۋعانستان مەن پاكىستانعا دا ساتۋىنا مۇمكىندىك بەرەدى. بۇل ازىرگە جوبا رەتىندە عانا، ءبىراق ونى ىسكە اسىرساق، قازاقستاننىڭ ەكسپورتتىق الەۋەتى ارتا تۇسەدى»، - دەدى ول.
اۆتور: جاسۇلان جولدىبايەۆ
