11:59, 08 - مامىر 2015 | GMT +5
ارداگەرلەردى تەك مەرەكەدە عانا ەمەس، ءار ۋاقىتتا دا قۇرمەتتەپ ءجۇرۋ قاجەت - ن. نازاربايەۆ - فوتو
استانا. قازاقپارات - مەنىڭ تىلەگىم، ەش ۋاقىتتا سوعىس بۇلتى توبەمىزدەن تونبەسىن. بۇگىن ەلورداداعى وتان قورعاۋشىلار مونۋمەنتىنە «داڭق گۇل تىزبەسىن» قويعان ق ر پرەزيدەنتى ن. نازاربايەۆ وسىنداي تىلەگىن جەتكىزدى.
ەلباسى ءوز سوزىندە ارداگەرلەردى ءار ۋاقىتتا دا قۇرمەتتەپ ءجۇرۋ قاجەتتىگىن باسا ايتتى. «تەك مەرەكەدە عانا ەمەس، جاي كۇندەرى دە جاستارىمىز اقساقالداردى، ارداگەرلەردى كورسە، سولارعا كوڭىل ءبولىپ، كومەكتەسىپ، قولپاشتاپ جۇرۋلەرى كەرەك. سەبەبى، ەرتەڭ سەن دە قارتاياسىڭ، سوندا بالالارىڭ سەنى دە ءدال سولاي سىيلايتىن بولادى. وسىنى ۇمىتپاسا ەكەن دەيمىن»، - دەدى ق ر پرەزيدەنتى.
سونىمەن قاتار مەملەكەت باسشىسى بارشا قازاقستاندىقتاردى جەڭىستىڭ 70 جىلدىق مەرەيتويىمەن قۇتتىقتاپ، زور دەنساۋلىق تىلەدى.
«ەلىمىز ءار ۋاقىتتا امان، جۇرتىمىز تىنىش بولسىن. اسپانىمىز اشىق بولسىن. ەش ۋاقىتتا سوعىس بۇلتى توبەمىزدەن تونبەسىن. مەنىڭ تىلەگىم سول»، - دەدى ن. نازاربايەۆ.
اۆتور: مارلان جيەمباي
