ازىق- تۇلىك يمپورتى العاش رەت تومەندەي باستادى - ا. مامىتبەكوۆ

استانا. قازاقپارات - شەتەلدەن اكەلىنەتىن ازىق-تۇلىك تاۋارلارىنىڭ كولەمى تومەندەي باستادى. بۇل تۋرالى بۇگىن ورتالىق كوممۋنيكاتسيالار قىزمەتىندە ق ر اۋىل شارۋاشىلىعى مينيسترى اسىلجان مامىتبەكوۆ حابارلادى.

«بىلتىر شەتەلدەن قازاقستانعا اۋىل شارۋاشىلىعى تاۋارلارىنىڭ يمپورتى ازايدى. ازىق-تۇلىك يمپورتى 6,2 پايىزعا كەمىدى، ال ەۋرازيالىق ەكونوميكالىق وداق ەلدەرىنەن كەلەتىن تاۋارلار 10 پايىزعا تومەندەدى. يمپورتتى الماستىرۋ باعىتىندا وڭ دامۋ بار، ماسەلەن ەت يمپورتى 42,3 پايىزعا، جۇمىرتقا ءۇش ەسە، كارتوپ ەكى ەسەگە، قيار 4,8 ەسەگە ازايدى. ونىڭ ۇستىنە ەكسپورتىمىز ءوسىپ كەلەدى. بىلتىر ءبىز العاش رەت ەت جانە ەت ونىمدەرىنىڭ 12 مىڭ تونناسىن ەكسپورتتادىق، ونىڭ 7 مىڭى سيىر ەتى. سونداي-اق وڭدەلگەن ەت ونىمدەرىنىڭ ەكسپورتى دا وسۋدە. شۇجىق جانە ەت كونسەرۆىلەرىنىڭ ەكسپورتى تيىسىنشە 9 جانە 2 ەسە ءوستى. شەتەلگە ءسۇتتى جەتكىزۋ كولەمى دە التى ەسەگە ارتتى»، - دەدى ول.

ونىڭ ايتۋىنشا، رەسەي مەن قازاقستان ۆاليۋتا باعامدارىنىڭ ايىرماشىلىعىنا قاراماستان، بۇنداي جاعىمدى احۋال بيىل دا ساقتالىپ وتىر.

«2015-جىلدىڭ ەكى ايى ىشىندە 620 توننا تاۋىق ەتى ەكسپورتتالدى. بىلتىر ەكى ايدا ونىڭ كولەمى تەك 141 توننا بولاتىن. بىلتىر سىر مەن ىرىمشىك ەكسپورتى بولماعان ەدى، بيىل ول 316 توننانى قۇرادى. بۇل - 2013-جىلى قابىلدانعان اگروبيزنەس-2020 باعدارلاماسىنىڭ العاشقى ناتيجەلەرى»، - دەپ ءتۇيدى ءسوزىن مينيستر.

اۆتور: جاسۇلان جولدىبايەۆ